គោលជំនឿ
សាសនាឥស្លាម គឺមានគោលជំនឿ(ជឿក្នុងចិត្ត) និងច្បាប់បញ្ញត្តិ(សម្រាប់ប្រតិបត្តិ)ត្រឹមត្រូវ។ហើយគោលជំនឿ គឺជាមូលដ្ឋានគ្រឹះដែលសាសនាត្រូវបញ្ឈរឡើងនៅលើវា។ គោលជំនឿឥស្លាម គឺជាគោលជំនឿដែលមានភាពច្បាស់លាស់ និងមានភាពងាយស្រួល ស្របទៅនឹងវិចារណញាណដ៏ត្រឹមត្រូវ និងបុព្វជំនឿពីកំណើតដ៏ស្អាតស្អំ។
ប្រធានបទរង
សក្ខីកម្ម(ស្ហាហាហ្ទះ)ទាំងពីរ
សាសនាឥស្លាមបានកំណត់ផ្តល់កាលីម៉ះតាវហេទ(ពាក្យដែលបញ្ជាក់ពីឯកទេពនិយមនៃអល់ឡោះជាម្ចាស់) គឺពាក្យ لاإلهإلاالله(គ្មានទេម្ចាស់ដែលត្រូវគោរពសក្ការៈដ៏ពិតប្រាកដ លើកលែងតែអល់ឡោះ)នូវឋានៈដ៏ធំធេង និងខ្ពង់ខ្ពស់បំផុត ហើយវាគឺជាកាតព្វកិច្ចដំបូងគេបង្អស់ចំពោះអ្នកមូស្លីម។ ដូច្នេះ ជនណាដែលមានបំណងចង់ចូលកាន់សាសនាឥស្លាម គឺចាំបាច់លើបុគ្គលនោះត្រូវជឿជាក់លើពាក្យនេះ និងពោលវាចេញពីមាត់។ ហើយជនណាដែលបានពោលវាដោយការជឿប្រាកដក្នុងចិត្ត និងស្វែងរកការពេញចិត្តពីអល់ឡោះជាម្ចាស់ នោះវានឹងក្លាយជាមូលហេតុមួយដែលជួយរូបគេឱ្យរួចផុតពីភ្លើងនរក ដូចដែលព្យាការី ﷺលោកបានមានប្រសាសន៍ថា៖ “ពិតណាស់ អល់ឡោះជាម្ចាស់ទ្រង់បានដាក់បម្រាមលើភ្លើងនរកចំពោះអ្នកដែលបានពោលថា لاإلهإلاالله(គ្មានទេម្ចាស់ដែលត្រូវគោរពសក្ការៈដ៏ពិតប្រាកដ គឺមានតែអល់ឡោះ) ដោយស្វែងរកការពេញចិត្តពីអល់ឡោះ”។ (ពូខរី៖៤១៥)
ជំនឿ
សារទាំងអស់របស់បណ្តាព្យាការីទាំងឡាយទៅកាន់ក្រុមរបស់ពួកគាត់ គឺមានការឯកភាពគ្នាជាឯកឆន្ទចំពោះការគោរពសក្ការៈទៅចំពោះអល់ឡោះជាម្ចាស់តែមួយគត់ ពុំមានស្ហ៊ីរិក(ពហុទេពនិយម)ចំពោះទ្រង់ និងប្រឆាំងចំពោះអ្វីដែលគេគោរពសក្ការៈក្រៅពីអល់ឡោះ។ នេះហើយជាអត្ថន័យនៃកាលីម៉ះតាវហេទ(ពាក្យដែលបញ្ជាក់ពីឯកទេពនិយមនៃអល់ឡោះជាម្ចាស់) គឺពាក្យ لاإلهإلاالله(គ្មានទេម្ចាស់ដែលត្រូវគោរពសក្ការៈដ៏ពិតប្រាកដ គឺមានតែអល់ឡោះ) ហើយវាជាពាក្យមួយដែលបុគ្គលទាំងឡាយនៅពេលចូលកាន់សាសនាឥស្លាមត្រូវពោលវា។
ការគោរពសក្ការៈ(អ៊ីហ្ពាហ្ទាត់)
ការគោរពសក្ការៈ(អ៊ីហ្ពាហ្ទាត់)៖ ជាការគោរពប្រតិបត្តិទូទៅជាមួយនឹងក្តីស្រឡាញ់ ការលើកតម្កើង និងការឱនលំទោន ហើយវាគឺជាសិទ្ធិរបស់អល់ឡោះជាម្ចាស់មកលើខ្ញុំបម្រើទាំងឡាយរបស់ទ្រង់។ ទ្រង់បានជ្រើសរើសវាជាពិសេសសម្រាប់ទ្រង់តែមួយគត់ មិនសម្រាប់អ្នកផ្សេងក្រៅពីទ្រង់ឡើយ ហើយវារួមបញ្ចូលនូវអ្វីៗទាំងអស់ដែលអល់ឡោះជាម្ចាស់ទ្រង់ស្រឡាញ់ និងពេញចិត្ត ទាំងពាក្យសម្តី និងកាយវិការដែលទ្រង់បានបង្គាប់ប្រើ និងជំរុញមនុស្សឱ្យធ្វើ មិនថាទង្វើនោះជាសកម្មភាពខាងក្រៅ ដូចជាការប្រតិបត្តិសឡាត ការបរិច្ចាគហ្សាកាត់ និងការធ្វើធម្មយាត្រាហាជ្ជី ឬជាទង្វើផ្នែកខាងក្នុង ដូចជាការហ្ស៊ីកៀរ(រលឹកអល់ឡោះ)ដោយចិត្ត ការខ្លាចទ្រង់ ការប្រគល់ការទុកចិត្តលើទ្រង់ ការសុំជំនួយពីទ្រង់ ឬក៏ទង្វើផ្សេងៗទៀតនោះឡើយ។
