បន្តរៀន

អ្នកមិនបានចុះឈ្មោះចូលទេ
ចុះឈ្មោះឥឡូវនេះក្នុងវេបសាយ(តាក)ដើម្បីតាមដានភាពល្អប្រសើររបស់អ្នក ប្រមូលពិន្ទុ និងការចូលរួមក្នុងការប្រកួតប្រជែង បន្ទាប់ពីមានការចុះឈ្មោះរួចហើយ អ្នកនឹងទទួលបានវិញ្ញាបនបត្រអ៊ីនធឺណិតក្នុងប្រធានបទដែលអ្នកសិក្សាវា

ផ្នែកបច្ចុប្បន្ន model:

មេរៀន សឡាតស៊ូណិត(សឡាតស្ម័គ្រចិត្ត)

សឡាតដែលជាកាតព្វកិច្ចក្នុងមួយថ្ងៃមួយយប់ គឺមានតែប្រាំពេលប៉ុណ្ណោះ។ ក៏ប៉ុន្តែមានសឡាតជាច្រើនទៀតដែលគេជំរុញឲ្យប្រតិបត្តិវាដើម្បីកាន់តែបន្ថែមនូវការបញ្ជិតខ្លួនទៅចំពោះអល់ឡោះជាម្ចាស់ដ៏មហាខ្ពង់ខ្ពស់។ នៅក្នុងមេរៀននេះ អ្នកនឹងសិក្សាពីសារៈសំខាន់នៃការសឡាតស៊ូណិត(សឡាតស្ម័គ្រចិត្ត)ទាំងនេះ។

  • យល់ដឹងពីសឡាតស៊ូណិតរ៉វ៉ាតិប
  • យល់ដឹងពីសឡាតសុំទឹកភ្លៀង
  • យល់ដឹងពីសឡាតអ៊ីស្ទីខរ៉ោះ
  • យល់ដឹងពីសឡាតហ្ទូហា
  • យល់ដឹងពីសឡាតសូរ្យគ្រាស និងចន្ទគ្រាស

count: ចំនួនសិស្សផ្សេងទៀតដែលបានបញ្ចប់មេរៀននេះ។

កាតព្វកិច្ចលើជនមូស្លីមត្រូវប្រតិបត្តិសឡាតក្នុងមួយថ្ងៃមួយយប់ តែប្រាំពេលប៉ុណ្ណោះ។ ព្រមជាមួយគ្នានេះ ច្បាប់បញ្ញត្តិឥស្លាមបានជំរុញអ្នកមូស្លីមឲ្យប្រតិបត្តិសឡាតស៊ូណិត(សឡាតស្ម័គ្រចិត្ត)បន្ថែមទៀតដើម្បីឲ្យវាក្លាយជាមូលហេតុទទួលបាននូវក្តីស្រលាញ់ពីអល់ឡោះជាម្ចាស់ និងជាការបំពេញនូវកង្វះខាតដែលមាននៅក្នុងសឡាតដែលជាកាតព្វកិច្ច(សឡាតហ្វើរទូ)។ អំពី អាពូហ៊ូរ៉យរ៉ោះ រទអ ពិតណាស់ ព្យាការី ﷺ លោកបានមានប្រសាសន៍ថា៖ “ពិតប្រាកដណាស់ អ្វីដែលគេយកមកជំនុំជម្រះមុនគេនៅថ្ងៃបរលោកអំពីទង្វើរបស់មនុស្សលោកនោះ គឺសឡាត។ លោកបានបន្តថា៖ ម្ចាស់របស់ពួកយើង(អល់ឡោះ)បានមានបន្ទូលទៅកាន់ម៉ាឡ៉ាអ៊ីកាត់របស់ទ្រង់ ខណៈដែលទ្រង់ជ្រាបបំផុតអំពីរឿងនោះថា៖ ចូរពួកអ្នកពិនិត្យមើលនៅក្នុងសឡាតខ្ញុំបម្រើរបស់យើង ថាតើវាពេញលេញហើយ ឬក៏នៅមានការខ្វះខាត។ ប្រសិនបើវាពេញលេញ នោះម៉ាឡាអ៊ីកាត់នឹងកត់ត្រាឲ្យគេថាពេញលេញ។ តែប្រសិនបើមានការខ្វះខាតអ្វីមួយនោះ ទ្រង់មានបន្ទូលថា៖ ចូរពួកអ្នកពិនិត្យមើលមើល៍ តើខ្ញុំបម្រើរបស់យើងមានសឡាតស៊ូណិត(សឡាតដោយស្ម័គ្រចិត្ត)ឬទេ? ពេលនោះ ប្រសិនបើគេមានសឡាតស៊ូណិត ទ្រង់មានបន្ទូលថា៖ ចូរយកសឡាតស៊ូណិត(សឡាតស្ម័គ្រចិត្ត)នោះទៅប៉ះប៉ូវបំពេញនូវភាពខ្វះខាតអំពីសឡាតហ្វើរទូ(សឡាតដែលជាកាតព្វកិច្ច)ឲ្យខ្ញុំបម្រើរបស់យើងចុះ។ បន្ទាប់មក ទង្វើទាំងអស់របស់ពួកគេក៏ត្រូវគេជំនុំជម្រះតាមរបៀបនេះដែរ”។ (ស៊ូណាន់អាពូហ្ទាវូទ៖៨៦៤)

ស៊ូណិតរ៉វ៉ាតិប(ស៊ូណិតអមហ្វើរទូ)

គេឲ្យឈ្មោះវាដូចនេះ ពីព្រោះវានៅអមនឹងសឡាតហ្វើរទូ(សឡាតដែលជាកាតព្វកិច្ច) និងដោយសារតែជនមូស្លីមតែងព្យាយាមថែរក្សាចំពោះវា។

ព្យាការី ﷺ លោកបានមានប្រសាសន៍ថា៖ “អ្នកអ៊ីស្លាមគ្រប់រូបដែលសឡាតដើម្បីអល់ឡោះរៀងរាល់ថ្ងៃចំនួន១២រ៉ក្អាត់ដោយស្ម័គ្រចិត្ដ ក្រៅពីសឡាតដែលជាកាតព្វកិច្ច នោះអល់ឡោះនឹងសង់ផ្ទះមួយសម្រាប់គេនៅក្នុងឋានសួគ៌”។ (មូស្លីម៖៧២៨)

ស៊ូណិតរ៉វ៉ាតិប(ស៊ូណិតអមហ្វើរទូ)

١
១. ពីររ៉ក្អាត់មុនសឡាតហ្វាជើរ
٢
២. បួនរ៉ក្អាត់មុនសឡាតហ្ស៊ូហូរ ដោយត្រូវសឡាតពីររ៉ក្អាត់ឲ្យសាឡាមម្ដង និងពីររ៉ក្អាត់ទៀតបន្ទាប់ពីសឡាតហ្ស៊ូហូរ
٣
៣. ពីររ៉ក្អាត់បន្ទាប់ពីរសឡាតម៉ាហ្គ្រិប
٤
៤. ពីររ៉ក្អាត់បន្ទាប់ពីរសឡាតអ៊ីស្ហា

សឡាតវីតៀរ

គេឲ្យឈ្មោះវាដូចនេះ ពីព្រោះចំនួនរ៉ក្អាត់របស់វា ជាចំនួនសេស(“វីតៀរ”ប្រែថា សេស) ហើយវាជាសឡាតស៊ូណិតដែលល្អប្រសើរជាងគេបំផុត។ ព្យាការី ﷺ លោកបានមានប្រសាសន៍ថា៖ “ចូរពួកអ្នកសឡាតវីតៀរចុះ ឱក្រុមអ្នកអាល់គួរអានទាំងឡាយ”។ (តៀរមីហ្ស៊ី៖៤៥៣, អ៊ិពនូម៉ាហ្ជះ៖១១៧០)

ពេលវេលាដែលល្អប្រសើរបំផុតសម្រាប់សឡាតវីតៀរ គឺនៅពេលចុងរាត្រី(មុននឹងហ្វាជើររះ) ហើយជនមូស្លីមអាចសឡាតនៅក្នុងកំឡុងពេលណាក៏បានដែរបន្ទាប់ពីសឡាតអ៊ីស្ហារួច រហូតដល់ហ្វាជើរ(សេតារុណ)រះ។

ចំនួនរ៉ក្អាត់នៃសឡាតវីតៀរ

តិចបំផុត គឺមួយរ៉ក្អាត់។ ព្យាការី ﷺ លោកធ្លាប់សឡាតវីតៀរចំនួនបីរ៉ក្អាត់ ប្រាំរ៉ក្អាត់ ប្រាំពីររ៉ក្អាត់ ប្រាំបួនរ៉ក្អាត់ និងដប់មួយរ៉ក្អាត់។

លក្ខណៈនៃសឡាតវីតៀរ

កម្រិតទាបជាងគេបំផុតនៃការសឡាតវីតៀរដែលមានលក្ខណៈពេញលេញនោះ គឺត្រូវសឡាតចំនួនបីរ៉ក្អាត់ ដោយត្រូវសឡាតពីររ៉ក្អាត់ រួចឲ្យសាឡាម បន្ទាប់មក សឡាតមួយរ៉ក្អាត់ទៀត ហើយឲ្យសាឡាមម្តងទៀត។ ហើយនៅក្នុងមួយរ៉ក្អាត់ចុងក្រោយនោះ (មុនពេលរូកុ ឬបន្ទាប់ពីងើបពីរូកុ) គេបង្គាប់ប្រើឲ្យលើកដៃទាំងពីរបួងសួងសុំទូអាពីអល់ឡោះ ដែលគេឲ្យឈ្មោះថា ទូអាគូនុត។

សឡាតសុំទឹកភ្លៀង

ជាសឡាតមួយដែលអល់ឡោះជាម្ចាស់ទ្រង់ដាក់ច្បាប់បញ្ញត្តិឲ្យប្រតិបត្តិវានៅពេលជួបប្រទះគ្រោះរាំងស្ងួត ហើយមានផលប៉ះពាល់ដល់មនុស្សដោយសារមានភ្លៀងតិចតួច។ គេបង្គាប់ប្រើឲ្យប្រតិបត្តិសឡាតនេះនៅទីវាល និងកន្លែងដែលល្ហល្ហេវ ប្រសិនបើអាច ហើយគេក៏អនុញ្ញាតឲ្យប្រតិបត្តិវានៅក្នុងម៉ាស្ជិតផងដែរ។

គេបង្គាប់ប្រើឲ្យអ្នកដែលទៅសឡាតទាំងអស់ចាកចេញទៅកាន់កន្លែងសឡាតដោយការកោតខ្លាច បន្ទាបខ្លួន ទទូចអង្វរករទៅកាន់អល់ឡោះជាម្ចាស់ប្រកបដោយការសារភាពកំហុសទៅចំពោះទ្រង់ និងត្រូវធ្វើនូវប្រការទាំងឡាយណាដែលជាមូលហេតុទទួលបាននូវក្តីមេត្តាករុណា និងការអាណិតអាសូរពីអល់ឡោះជាម្ចាស់ ដូចជាការសុំការអភ័យទោស បង្វិលត្រឡប់ទៅឲ្យអ្នកដែលខ្លួនបានបំពានវិញនូវសិទ្ធិរបស់ពួកគេ បរិច្ចាគទាន និងធ្វើល្អទៅចំពោះមនុស្ស។ -ល-។

របៀបសឡាតសុំទឹកភ្លៀង

សឡាតសុំទឹកភ្លៀង គឺដូចសឡាតរ៉យ៉ាដូច្នោះដែរ ដោយវាមានចំនួនពីររ៉ក្អាត់ ហើយអ៊ីម៉ាំត្រូវសូត្រឮៗទាំងពីររ៉ក្អាត់នោះ។ ច្បាប់ឥស្លាមបង្គាប់ប្រើឲ្យបន្ថែមតឹកពៀរនៅក្នុងពេលចាប់ផ្ដើមរ៉ក្អាត់នីមួយៗ ដោយត្រូវតឹកពៀរចំនួនប្រាំមួយដងនៅក្នុងរ៉ក្អាត់ទីមួយក្រៅពីតឹកពីរ៉តុលអៀហរ៉មមុននឹងសូត្រស៊ូរ៉ោះ និងតឹកពៀរចំនួនប្រាំដងនៅក្នុងរ៉ក្អាត់ទីពីរក្រៅពីតឹកពៀរក្រោកអំពីស៊ូជោត។ ក្រោយពេលសឡាតចប់ ត្រូវសូត្រឃុតហ្ពះ ហើយត្រូវលើកឡើងឲ្យបានច្រើននៅក្នុងឃុតហ្ពះនោះនូវការសុំការអភ័យទោសពីអល់ឡោះជាម្ចាស់ និងទទូចអង្វរករទៅចំពោះទ្រង់ដោយការបួងសួងសុំទូអា។

សឡាតអ៊ីស្ទីខរ៉ោះ(សឡាតសុំការជ្រើសរើសពីអល់ឡោះ)

វាជាសឡាតដែលគេដាក់ច្បាប់បញ្ញត្តិលើជនមូស្លីមនៅពេលដែលគេមានទុក្ខកង្វល់ពីរឿងអ្វីមួយ ហើយគេមិនដឹងថា តើវាល្អ ឬមិនល្អសម្រាប់រូបគេ។

ការដាក់ច្បាប់បញ្ញត្តិឲ្យប្រតិបត្តិវា

នៅពេលដែលណាដែលជនមូស្លីមមានទុក្ខកង្វល់ពីរឿងអ្វីមួយ ហើយគេមិនដឹងថា តើប្រការនោះល្អ ឬមិនល្អសម្រាប់រូបគេ គឺក្នុងពេលនោះ ស៊ូណិតឲ្យគេសឡាតពីររ៉ក្អាត់ រួចសុំទូអាបន្ទាប់ពីសឡាតរួចនូវទូអាមួយដែលមានភស្តុតាងបញ្ជាក់ពីព្យាការី ﷺ ដែលលោកបានបង្រៀនវាដល់សហាហ្ពាត់ មិត្តភក្តិរបស់លោក នោះគឺ៖ ( اللَّهُم إِني أَسْتَخِيرُكَ بعِلْمِكَ ، وأستقدِرُكَ بقُدْرِتك ، وأَسْأَلُكَ مِنْ فضْلِكَ العَظِيم ، فإِنَّكَ تَقْدِرُ ولا أَقْدِرُ ، وتعْلَمُ ولا أَعْلَمُ ، وَأَنتَ علاَّمُ الغُيُوبِ . اللَّهُمَّ إِنْ كنْتَ تعْلَمُ أَنَّ هذا الأمرَ - ويسمى حاجته- خَيْرٌ لي في دِيني وَمَعَاشي وَعَاقِبَةِ أَمْرِي ، فاقْدُرْهُ لي وَيَسِّرْهُ لي، ثمَّ بَارِكْ لي فِيهِ ، وَإِن كُنْتَ تعْلمُ أَنَّ هذَا الأَمْرَ شرٌّ لي في دِيني وَمَعاشي وَعَاقبةِ أَمَرِي ، فاصْرِفهُ عَني ، وَاصْرفني عَنهُ، وَاقدُرْ لي الخَيْرَ حَيْثُ كانَ ، ثُمَّ رَضِّني بِهِ) មានន័យថា៖ “ឱអល់ឡោះជាម្ចាស់! ខ្ញុំសុំជម្រើសអំពីទ្រង់ ដោយសារការដឹងរបស់ទ្រង់ ខ្ញុំសុំអំពីទ្រង់មេត្ដាកំណត់(អ្វីដែលល្អឲ្យខ្ញុំ)ដោយលទ្ធភាពរបស់ទ្រង់ ហើយខ្ញុំសុំពីទ្រង់នូវក្ដីករុណាដ៏ធំធេងរបស់ទ្រង់។ ទ្រង់ហើយជាអ្នកមានអានុភាព ចំណែកខ្ញុំគ្មានអានុភាពអ្វីឡើយ។ ទ្រង់ជាអ្នកដឹងបំផុត ចំណែកខ្ញុំមិនដឹងឡើយ ហើយទ្រង់ជាអ្នកដឹងនូវប្រការអាថ៌កំបាំងទាំងអស់។ ឱអល់ឡោះជាម្ចាស់! ប្រសិនបើទ្រង់ដឹងថា កិច្ចការនេះ (ត្រង់កន្លែងនេះ គាត់ត្រូវហៅឈ្មោះកិច្ចការរបស់គាត់នោះ) ល្អសម្រាប់ខ្ញុំទាំងផ្នែកសាសនា ការរស់នៅ និងលទ្ធផលចុងក្រោយរបស់ខ្ញុំ សូមទ្រង់កំណត់វាឲ្យខ្ញុំ សម្រួលវាឲ្យខ្ញុំ និងប្រសិទ្ធិពរដល់ខ្ញុំចំពោះវាផង។ ផ្ទុយទៅវិញ ប្រសិនបើទ្រង់ដឹងថា កិច្ចការនេះអាក្រក់សម្រាប់ខ្ញុំទាំងផ្នែកសាសនា ការរស់នៅ និងលទ្ធផលចុងក្រោយរបស់ខ្ញុំ សូមទ្រង់មេត្ដាបញ្ចៀសវាអំពីខ្ញុំ បញ្ចៀសខ្ញុំអំពីវា និងកំណត់ឲ្យខ្ញុំនូវអ្វីដែលល្អ ទោះជានៅទីកន្លែងណា និងពេលណាក៏ដោយ។ បន្ទាប់មក សូមទ្រង់ឲ្យខ្ញុំមានចិត្ដស្កប់ស្កល់ចំពោះវាផងចុះ”។

ទូអាសឡាតអ៊ីស្ទីខរ៉ោះ

សឡាតហ្ទូហា

ស្ថិតក្នុងចំណោមសឡាតស៊ូណិតដែលមានភស្តុតាងបញ្ជាក់ពីឧត្ដមភាព និងផលបុណ្យដ៏ធំធេងរបស់វា។ ចំនួនតិចបំផុតនៃសឡាតហ្ទូហា គឺពីររ៉ក្អាត់។ រីឯពេលវេលារបស់វា គឺបន្ទាប់ពីព្រះអាទិត្យរះឡើងកម្ពស់មួយថ្នោល(ប្រហែល១៥នាទីក្រោយថ្ងៃរះ) រហូតដល់មុនថ្ងៃជ្រេបន្តិច ហើយចូលពេលវេលាសឡាតហ្ស៊ូហូរ។

សឡាតស៊ូណិតសូរ្យគ្រាស ឬចន្ទគ្រាស

សូរ្យគ្រាស ឬចន្ទគ្រាស គឺជាបាតុភូតអវកាសដែលកើតមានខុសពីធម្មតានៅពេលដែលពន្លឺនៃព្រះអាទិត្យ ឬព្រះចន្ទត្រូវបានបាត់ទាំងស្រុង ឬដោយផ្នែក។ វាជាសញ្ញាភស្តុតាងមួយក្នុងចំណោមសញ្ញាភស្តុតាងនានារបស់អល់ឡោះជាម្ចាស់ដែលបង្ហាញពីសមត្ថភាពនិងព្រះចេស្តារបស់ទ្រង់ និងជាការដាស់តឿនព្រមានដល់មនុស្សលោកដែលលង់លក់ក្នុងការភ្លេចភ្លាំង ធ្វេសប្រហែសឲ្យខ្លាចចំពោះអល់ឡោះ និងរំពឹងផលបុណ្យអំពីទ្រង់។

ព្យាការី ﷺ លោកបានមានប្រសាសន៍ថា៖ ”ពិតប្រាកដណាស់ព្រះអាទិត្យ(សូរ្យគ្រាស) និងព្រះចន្ទ(ចន្ទគ្រាស)មិនមែនកើតឡើងដោយសារការស្លាប់របស់មនុស្ស(អ្នកមានបុណ្យ)ណាម្នាក់ឡើយ ក៏ប៉ុន្តែ វាទាំងពីរគឺជាសញ្ញាភស្តុតាងមួយក្នុងចំណោមសញ្ញាភស្តុតាងនានារបស់អល់ឡោះជាម្ចាស់។ ហេតុនេះ ប្រសិនបើពួកអ្នកបានឃើញវាទាំងពីរ(សូរ្យគ្រាស ឬចន្ទគ្រាស) ចូរក្រោកឈរ ហើយប្រតិបត្តិសឡាត(ស៊ូណិតសូរ្យគ្រាស ឬចន្ទគ្រាស)”។ (ពូខរី៖១០៤១)

របៀបសឡាតសូរ្យគ្រាស ឬចន្ទគ្រាស

សឡាតស៊ូណិតសូរ្យគ្រាស ឬចន្ទគ្រាស មានពីររ៉ក្អាត់ ក៏ប៉ុន្តែនៅក្នុងរ៉ក្អាត់នីមួយៗ គឺគេបង្គាប់ប្រើឲ្យធ្វើការរូកុចំនួនពីរដង ដោយក្រោយពេលដែលគេងើបពីរូកុនៅរ៉ក្អាត់ទីមួយ គឺគេត្រូវសូត្រស៊ូរ៉ោះអាល់ហ្វាទីហះ និងអ្វីដែលងាយស្រួលសម្រាប់គេអំពីគម្ពីរគួរអានម្ដងទៀត។ បន្ទាប់មក ត្រូវឱនរូកុ ហើយងើបពីរូកុវិញ រួចចុះទៅស៊ូជោតចំនួនពីរដង។ នេះគឺគេចាត់ទុកថាបានមួយរ៉ក្អាត់ពេញ។ បន្ទាប់មកទៀត គេត្រូវក្រោកពីស៊ូជោតវិញ ហើយត្រូវធ្វើនៅក្នុងរ៉ក្អាត់ទីពីរនេះដូចអ្វីដែលគេបានធ្វើនៅក្នុងរ៉ក្អាត់ទីមួយដូច្នោះដែរ។

អ្នកបានបញ្ចប់មេរៀនដោយជោគជ័យ


ចាប់ផ្តើមប្រឡង