ផ្នែកបច្ចុប្បន្ន model:
មេរៀន ការធ្វើសាក្សីថា គ្មានទេម្ចាស់ដែលត្រូវគោរពសក្ការៈដ៏ពិតប្រាកដ គឺមានតែអល់ឡោះ
សាសនាឥស្លាមបានកំណត់ផ្តល់សក្ខីកម្មនៃជំនឿចំពោះពាក្យ لاإله إلاالله នូវឋានៈដ៏ធំធេង និងខ្ពង់ខ្ពស់បំផុត។
ឋានៈរបស់ពាក្យ لا إله إلا الله (គ្មានទេម្ចាស់ដែលត្រូវគោរពសក្ការៈដ៏ពិតប្រាកដ គឺមានតែអល់ឡោះ)
អាស្រ័យហេតុនេះ ពាក្យសក្ខីកម្ម " لا إله إلا الله" (គ្មានទេម្ចាស់ដែលត្រូវគោរពសក្ការៈដ៏ពិតប្រាកដ គឺមានតែអល់ឡោះ) គឺជាកាតព្វកិច្ចដ៏ធំធេង និងមានសារៈសំខាន់បំផុត។
អត្ថន័យនៃពាក្យ لا إله إلا الله
“ព្រះជាម្ចាស់” គឺសំដៅលើអ្នកដែលត្រូវគេគោរពសក្ការៈ ឱនលំទោន លើកតម្កើង សុំបួងសួង កោតខ្លាច និងមានក្តីសង្ឃឹមទៅចំពោះទ្រង់។ ហេតុនេះ បុគ្គលណាដែលឱនលំទោនទៅចំពោះអ្វីមួយ ហើយបន្ទាបខ្លួនទៅចំពោះរបស់នោះ ស្រឡាញ់របស់នោះ មានក្តីសង្ឃឹមលើរបស់នោះ គឺគេពិតជាបានយករបស់នោះធ្វើជាព្រះជាម្ចាស់គោរពសក្ការៈហើយ។ ហើយអ្វីដែលត្រូវបានគេគោរពសក្ការៈទាំងអស់នោះ គឺជាព្រះក្លែងក្លាយ លើកលែងតែព្រះជាម្ចាស់តែមួយគត់ នោះគឺអល់ឡោះជាម្ចាស់ ជាព្រះដែលជាអ្នកបង្កើតអ្វីៗទាំងអស់ដ៏មហាខ្ពង់ខ្ពស់។
ពិតណាស់ ទ្រង់ជាព្រះជាម្ចាស់ដែលសក្តិសមនឹងឲ្យគេគោរពសក្ការៈតែមួយគត់ គ្មានព្រះឯណាផ្សេងក្រៅពីទ្រង់ឡើយ។ ទ្រង់ជាអ្នកដែលគេត្រូវគោរពសក្ការៈដោយក្តីស្រឡាញ់ លើកតម្កើង បន្ទាបខ្លួន កោតខ្លាច ប្រគល់ការទុកចិត្ត និងបួងសួងសុំអំពីទ្រង់។ ដូចនេះ គេមិនត្រូវបួងសួងសុំពីនរណាក្រៅពីអល់ឡោះឡើយ ហើយក៏មិនត្រូវសុំជំនួយពីនរណាក្រៅពីទ្រង់នោះដែរ។ មិនត្រូវប្រគល់ការទុកចិត្តលើនរណាក្រៅពីទ្រង់ មិនត្រូវប្រតិបត្តិសឡាត(ថ្វាយបង្គំ)ទៅចំពោះនរណាក្រៅពីទ្រង់ និងមិនត្រូវសំឡេះសត្វដើម្បីបញ្ជិតខ្លួនទៅចំពោះនរណាក្រៅពីទ្រង់ឡើយ។ ដូច្នេះ ចាំបាច់ត្រូវមានចិត្តស្មោះស ជ្រះថ្លាក្នុងការគោរពសក្ការៈទៅចំពោះអល់ឡោះជាម្ចាស់តែមួយគត់ ដូចដែលទ្រង់បានមានបន្ទូលថា៖ “ហើយពួកគេមិនត្រូវបានគេបញ្ជាឱ្យធើ្វអ្វីក្រៅពីឱ្យពួកគេគោរពសក្ការៈចំពោះអល់ឡោះដោយចិត្ដស្មោះស និងត្រឹមត្រូវចំពោះទ្រង់ឡើយ”។ (អាល់ហ្ពៃយីណះ៖៤)
ជនណាដែលគោរពសក្ការៈទៅចំពោះអល់ឡោះជាម្ចាស់ដោយចិត្តស្មោះសចំពោះទ្រង់ ស្របទៅនឹងអត្ថន័យរបស់ពាក្យ لا إله إلا الله (គ្មានទេម្ចាស់ដែលត្រូវគេគោពសក្ការៈដ៏ពិតប្រាកដ គឺមានតែអល់ឡោះ) ពេលនោះ គេនឹងទទួលបានសុភមង្គលដ៏ធំធេង ស្ងប់សុខ រីករាយ និងទទួលបាននូវជីវិតរស់នៅមួយដ៏ល្អប្រសើរ។ ជាការពិតណាស់ ដួងចិត្តនឹងគ្មានសេចក្តីស្ងប់សុខពិតប្រាកដន គ្មានភាពនឹងនររនោះឡើយ លើកលែងតែមានការទទួលយកអល់ឡោះតែមួយគត់ នៅក្នុងការគោរពសក្ការៈប៉ុណ្ណោះ។ ដូចដែលអល់ឡោះជាម្ចាស់ទ្រង់បានមានបន្ទូលថា៖ “ជនណាហើយដែលបានសាងអំពើល្អក្នុងចំណោមបុរស ឬស្ដ្រី ហើយគេជាអ្នកមានជំនឿទៀតនោះ យើងពិតជានឹងធ្វើឱ្យគេមានជីវិតរស់នៅដ៏ល្អប្រសើរ”។ (អាន់ណះល៍៖៩៧)
