ផ្នែកបច្ចុប្បន្ន model:
មេរៀន សឡាតលើសព និងបញ្ចុះសព
កាតព្វកិច្ចសឡាតលើសពចំពោះក្រុមអ្នកមូស្លីមដែលមានវត្តមាន ពុំមែនចំពោះបុគ្គលម្នាក់ៗនៃពួកគេឡើយ។ វាគឺជាហ្វើរទូគីហ្វាយ៉ះដែលនៅពេលណាដែលមានអ្នកមួយចំនួនក្នុងចំណោមពួកគេអនុវត្តហើយនោះ អ្នកដទៃទៀតគឺរួចផុតពីបាបកម្មទាំងអស់គ្នា។ ពិតណាស់ ព្យាការី សល់ឡល់ឡហ៊ូអាឡៃហ៊ីវ៉ាសាល់ឡាំ លោកបានផ្តល់ដំណឹងរីករាយដល់អ្នកដែលបានសឡាតលើសពថា រូបគេនឹងទទួលបានផលបុណ្យយ៉ាងធំធេងប៉ុនភ្នំ។ លោកបានមានប្រសាសន៍ថា៖ "បុគ្គលណាមានវត្តមានជាមួយសពរហូតដល់គេសឡាតឲ្យសពនោះ គេនឹងទទួលបានផលបុណ្យមួយគីរ៉ត។ ហើយបុគ្គលណាមានវត្តមានរហូតដល់គេបញ្ចុះសព នោះគេនឹងទទួលបាន ផលបុណ្យពីរគីរ៉ត"។ មានគេសួរថា៖ "តើអ្វីទៅពីរគីរ៉តនោះ"? លោកបានឆ្លើយថា៖ "គឺស្មើនឹងភ្នំដ៏ធំពីរ"។ (ពូខរី៖១៣២៥, មូស្លីម៖៩៤៥)
ឧត្តមភាពនៃការចូលរួមមរណទុក្ខ
ការមានវត្តមានជាមួយសព និងដង្ហែរតាមសព គឺមានផលប្រយោជន៍យ៉ាងធំធេង ក្នុងនោះដែលសំខាន់ជាងគេ គឺការបំពេញនូវសិទ្ធិរបស់អ្នកស្លាប់តាមរយៈការសឡាតលើសព, ការជួយអន្តរាគមន៍ដល់សព និងការបួងសួងឲ្យសព, ការបំពេញនូវសិទ្ធិរបស់ក្រុមគ្រួសារសព និងលួងលោមអារម្មណ៍ពួកគេក្នុងពេលដែលពួកគេជួបទុក្ខដោយសារតែមរណភាពសមាជិកគ្រួសាររបស់គេ, ទទួលបានផលបុណ្យយ៉ាងធំធេងចំពោះអ្នកដែលដង្ហែរតាមសព ក៏ដូចជាការទទួលបាននូវដំបូន្មាន និងយកជាបទពិសោធតាមរយៈការដែលរូបគេបានឃើញអ្នកស្លាប់ និងផ្នូរជាច្រើន -ល-។
១. ស៊ូណិតប្រតិបត្តិសឡាតលើសពជាលក្ខណៈរួម(ជើម៉ាអះ)ដោយចាត់តាំងបុរសម្នាក់ធ្វើជាអ៊ីម៉ាំដឹកនាំសឡាត។
២. ដាក់សពនៅខាងគិបឡាត់ ពីមុខអ្នកសឡាតទាំងឡាយ។ ប្រសិនបើសពជាបុរស អ៊ីម៉ាំត្រូវឈរត្រង់ផ្នែកខាងក្បាលសព។ តែប្រសិនបើសពជាស្រ្តីវិញ អ៊ីម៉ាំត្រូវឈរត្រង់កណ្តាលខ្លួនសព ដូចដែលមានភស្តុតាងបញ្ជាក់ពីរ៉ស៊ូលុលឡោះ សល់ឡល់ឡហ៊ូអាឡៃហ៊ីវ៉ាសាល់ឡាំ។ (អាពូហ្ទាវូទ៖3194)
-
តឹកពៀរទីមួយ
អ្នកសឡាតត្រូវតឹកពៀរលើកទីមួយដោយលើកដៃទាំងពីរឲ្យស្មើស្មា ឬត្រចៀក។ បន្ទាប់មក ដាក់ដៃស្តាំលើដៃឆ្វេងនៅលើទ្រូង និងពុំមានសូត្រទូអាអ៊ិសទីហ្វតះឡើយ។ បន្ទាប់មកសូត្រ أعوذ بالله من الشيطان الرجيم រួចសូត្រ بسم الله الرحمن الرحيم ។ បន្ទាប់មក សូត្រស៊ូរ៉ោះអាល់ហ្វាទីហះដោយសូត្រតិចៗ។
តឹកពៀរទីពីរ
បន្ទាប់មក ត្រូវតឹកពៀរជាលើកទីពីរ រួចសឡាវ៉ាតលើណាពី សល់ឡល់ឡហ៊ូអាឡៃហ៊ីវ៉ាសាល់ឡាំ ដោយទម្រង់ណាមួយក៏បាន ដូចជាសូត្រថា៖ اللهم صل وسلم على نبينا محمد، ។ ប្រសិនបើគេសឡាវ៉ាតតាមទម្រង់ដែលមានលក្ខណៈពេញលេញដូចដែលគេសូត្រក្នុងពេលតះយិតចុងក្រោយក្នុងពេលសឡាតនោះ គឺកាន់តែប្រសើរ។ ទម្រង់សឡាវ៉ាតនោះគឺ៖ اللّهمَّ صلّ على محمدٍ وعَلَى آلِ محمدٍ كما صليتَ على إِبراهيمَ وعلى آلِ إبراهيمَ إنكَ حَميدٌ مَجيد، اللّهمَّ بارك على محمدٍ وعلى آلِ محمدٍ كما باركتَ على إِبراهيم وعلى آلِ إبراهيمَ إِنَّكَ حَميدٌ مَجيد ។
តឹកពៀរទីបី
បន្ទាប់មកទៀត ត្រូវតឹកពៀរជាលើកទីបី រួចបួងសួងសុំទូអាឲ្យសពទទួលបាននូវក្តីមេត្តាករុណា ការអភ័យទោស និងឋានសួគ៌តាមអ្វីដែលគេនឹកឃើញ។ តែប្រសិនបើគេសុំទូអាឲ្យសពតាមទម្រង់ដែលមានភស្តុតាងបញ្ជាក់ត្រឹមត្រូវពីព្យាការី គឺកាន់តែប្រសើរ។
ក្នុងចំណោមទូអាដែលមានភស្តុតាងបញ្ជាក់ទាំងនោះ មានដូចជា៖ " اللَّهُمَّ اغْفِرْ لَهُ وَارْحَمْهُ ، وَعَافِهِ وَاعْفُ عَنْهُ ، وَأكْرِمْ نُزُلَهُ ، وَوَسِّعْ مُدْخَلَهُ ، وَاغْسِلْهُ بِالمَاءِ وَالثَّلْجِ وَالبَرَدِ ، وَنَقِّه مِن الخَطَايَا كَمَا نَقَّيْتَ الثَّوْبَ الأَبْيَضَ مِنَ الدَّنَس ، وَأبدلْهُ دَاراً خَيْراً مِنْ دَارِهِ ، وَأهْلاً خَيراً مِنْ أهْلِهِ ، وَزَوْجَاً خَيْراً مِنْ زَوْجِهِ ، وَأدْخِلهُ الجَنَّةَ ، وَأعِذْهُ مِنْ عَذَابِ القَبْرِ ، وَمنْ عَذَابِ النَّارِ " មានន័យថា៖ "ឱអល់ឡោះជាម្ចាស់! សូមអភ័យទោសដល់គាត់ អាណិតស្រលាញ់គាត់ ផ្ដល់សុវត្ថិភាពដល់គាត់ អធ្យាស្រ័យដល់គាត់ ផ្ដល់កិត្ដិយសដល់ការស្នាក់នៅរបស់គាត់ ធ្វើឲ្យផ្នូររបស់គាត់ធំទូលាយ លាងសម្អាតគាត់នឹងទឹក ព្រិល និងព្រិលទឹកក សម្អាតគាត់អំពីបាបកម្មដូចដែលទ្រង់សម្អាតក្រណាត់ពណ៌សអំពីកម្អែល។ សូម ទ្រង់ផ្លាស់ប្ដូរឲ្យគាត់នូវលំនៅឋានដែលល្អជាងលំនៅឋានពីមុនរបស់គាត់ គ្រួសារដែលល្អជាងគ្រួសាររបស់គាត់ ភរិយាដែលល្អជាងភរិយារបស់គាត់។ សូម ទ្រង់បញ្ចូលគាត់ទៅក្នុងឋានសួគ៌ ហើយបញ្ជៀសគាត់ពីទណ្ឌកម្មនៅក្នុងផ្នូរ និងក្នុងឋាននរកផង"។ (មូស្លីម៖៩៦៣)
តឹកពៀរទីបួន
បន្ទាប់មកទៀ តឹកពៀរជាលើកទីបួន រួចឈប់បន្តិច ហើយឲ្យសាឡាម ដោយឲ្យសាឡាមទៅខាងស្តាំប៉ុណ្ណោះ។
គេអនុញ្ញាតឲ្យប្រតិបត្តិសឡាតលើសពនៅក្នុងម៉ាស្ជិត ឬកន្លែងដាច់ដោយឡែកណាមួយដែលគេរៀបចំសម្រាប់សឡាតលើសពនៅខាងក្រៅម៉ាស្ជិត ឬក៏សឡាតនៅឯទីផ្នូរតែម្តងក៏បាន ព្រោះទាំងនោះ គឺសុទ្ធតែមានភស្តុតាងបញ្ជាក់ពីព្យាការី សល់ឡល់ឡហ៊ូអាឡៃហ៊ីវ៉ាសាល់ឡាំ ។
តាមស៊ុណ្ណះ គប្បីរួសរាន់ក្នុងការរៀបចំសព សឡាតលើសព និងនាំសពទៅកាន់ទីបញ្ចុះសព ក៏ដូចជារួសរាន់ក្នុងការរៀបចំបញ្ចុះ។ អំពី អាពូ ហ៊ូរ៉យរ៉ោះ រ៉ទីយ៉ល់ឡហ៊ូអាន់ហ៊ូ អំពីព្យាការី សល់ឡល់ឡហ៊ូអាឡៃហ៊ីវ៉ាសាល់ឡាំ លោកបានមានប្រសាសន៍ថា៖ "ចូរពួកអ្នកដើរអោយលឿនពេលដង្ហែរសពទៅបញ្ចុះ។ ប្រសិនបើសពនោះល្អ គឺជាការល្អដែលពួកអ្នកនាំគាត់ឲ្យទៅជួបប្រការល្អនោះ។ ប៉ុន្ដែផ្ទុយទៅវិញ ប្រសិនបើសពនោះមិនល្អវិញ គឺពួកអ្នកបានទម្លាក់ប្រការអាក្រក់នោះចេញអម្រែក របស់ពួកអ្នក"។ (ពូខរី៖១៣១៥, មូស្លីម៖៩៤៤)
ចំពោះអ្នកដែលចូលរួមដង្ហែរសព ស៊ូណិតចូលរួមសែងសព ហើយអ្នកដែលសែងសពនោះ គឺជាបុរស ពុំមែនស្ត្រីឡើយ។ ហើយស៊ូណិតដើរពីមុខ និងពីក្រោយសព។ ប្រសិនបើកន្លែងបញ្ចុះសពនោះនៅឆ្ងាយ ឬមានការលំបាកក្នុងការសែងសព(ដោយផ្ទាល់ដៃ)ទៅកាន់ទីនោះ គឺគេអាចដឹកសពដោយរថយន្ត ឬអ្វីផ្សេងទៀតបាន គឺគ្មានបញ្ហាអ្វីឡើយ។
បញ្ហាដែលគប្បីយកចិត្តទុកដាក់ក្នុងពេលបញ្ចុះសព
ចំពោះអ្នកដែលមានវត្តមាននៅកន្លែងបញ្ចុះសព ក្រោយពីគេបានបញ្ចុះសពរួចរាល់ ស៊ូណិតបួងសួងសុំទូអាឲ្យសពមានលំនឹងចិត្ត និងទទួលបានការអភ័យទោសពីអល់ឡោះ។ ពិតណាស់ ព្យាការី សល់ឡល់ឡហ៊ូអាឡៃហ៊ីវ៉ាសាល់ឡាំ នៅពេលលោករួចរាល់ពីការបញ្ចុះសព លោកបានឈរនៅទីនោះ ហើយលោកបានមានប្រសាសន៍ថា៖ "ចូរពួកអ្នកសុំការអភ័យទោសពីអល់ឡោះឲ្យបងប្អូនរបស់ពួកអ្នក និងសុំពីទ្រង់ឲ្យគាត់មានភាពនឹងនរ(ពេលឆ្លើយនឹងសំណួរ)ផង ព្រោះពេលនេះ គាត់កំពុងតែត្រូវបានគេសួរចម្លើយហើយ"។
