ផ្នែកបច្ចុប្បន្ន model:
មេរៀន ការរកស៊ី និងការស្វែងរករ៉ីសគី
សារៈសំខាន់នៃទ្រព្យសម្បត្តិ
មនុស្សគ្រប់គ្នាត្រូវការលុយកាក់ដើម្បីបំពេញតម្រូវការចម្បងរបស់ខ្លួន ដូចជា៖ អាហារ ភេសជ្ជៈ កន្លែងស្នាក់នៅ និងសំលៀកបំពាក់ជាដើម។ ព្រមទាំងអត្ថប្រយោជន៍ជាច្រើនទៀត ដើម្បីធ្វើឲ្យជីវិតរបស់គាត់ប្រសើរឡើង។ សាសនាអ៊ីស្លាមបានផ្ដល់សារៈសំខាន់យ៉ាងធំធេងចំពោះលុយកាក់ ហើយបានបង្កើតច្បាប់ជាច្រើនទាក់ទងនឹងការទទួល ឫស្វែងរក និងចំណាយវាផងដែរ។
ការរកស៊ី និងការស្វែងរករ៉ីសគី គឺសំដៅលើមធ្យោបាយ និងសកម្មភាពទាំងឡាយដែលមនុស្សគ្រប់គ្នាធ្វើឡើង ដើម្បីទទួលបានប្រាក់កាក់ និងរបស់ដែលគេត្រូវការនៅក្នុងជីវិត។ មិនថាតាមរយៈការធ្វើពាណិជ្ជកម្ម ឧស្សាហកម្ម កសិកម្ម និងផ្សេងៗទៀត។
ច្បាប់នៃការរកស៊ី និងការស្វែងរករ៉ីសគី
ប្រសិនបើគោលបំណងនៃការរកស៊ីគឺដើម្បីអួតនិងគុណនោះ វាគឺម៉ាក្រួស (មិនពេញចិត្ត) ហើយសាសនិកវិទូឥស្លាមមួយចំនួនយល់ថាវាត្រូវបានហាមឃាត់។
សម្រាប់ជនមូស្លីមដែលធ្វើការរកស៊ី និងស្វែងរករ៉ីសគីត្រូវតែមានចំណេះដឹងពាក់ព័ន្ធ និងការយល់ដឹងអំពីច្បាប់នៃប្រតិបត្តិការហិរញ្ញវត្ថុ ដូចជា ច្បាប់នៃការលក់ ជួល បើកអាជីវកម្ម ភាគហ៊ុន និងប្រតិបត្តិការផ្សេងទៀត ដែលគេកំពុងតែធ្វើ ដើម្បីកុំឲ្យរូបគេធ្លាក់ចូលទៅក្នុងការរកស៊ី ដែលអល់ឡោះបានហាមឃាត់។
សីលធម៍នៃការរកស៊ី និងការស្វែងរករ៉ីសគី
1. មិនត្រូវបណ្តោយឲ្យការរកស៊ីពន្យារពេល ឬបញ្ឈប់កាតព្វកិច្ចណាមួយដែលអល់ឡោះបានកំណត់នោះទេ ព្រោះកាតព្វកិច្ចរបស់អល់ឡោះគឺជារឿងចម្បងបង្អស់ដែលជនមូស្លីម ត្រូវរៀបចំពេលវេលា និងយកចិត្តទុកដាក់បំផុត។
2. មិនត្រូវបង្កគ្រោះថ្នាក់ ឫផលប៉ះពាល់ដល់អ្នកដទៃនោះឡើយ ។
3. ត្រូវតែមានចេតនាល្អ ដូចជា រកស៊ីដើម្បីកុំឲ្យរូបគេ និងអ្នកដែលនៅក្នុងបន្ទុករបស់គេក្រលំបាក សុំជំនួយពីអ្នកដ៏ទៃ និងដើម្បីសម្រួលដល់ការគោរពប្រតិបត្តិទៅចំពោះអល់ឡោះ។ ដោយគេគ្មានបំណងដើម្បីប្រមូលទ្រព្យសម្បត្តិ ឫប្រកួតប្រជែង និងអួតអ្នកដទៃ ឬមានគោលបំណងមិនល្អផ្សេងទៀតនោះឡើយ។
នៅពេលដែលអ្នកមូស្លីមមានភាពស្មោះសក្នុងការស្វែងរករ៉ីសគី និងមានបំណងផ្តល់សប្បុរសធម៌ដល់អ្នកដ៏ទៃនូវអ្វីដែលគេទទួលបាន និងដើម្បីធ្វើឱ្យជីវិតរបស់គេប្រសើរឡើង។ ការស្វែងរករ៉ីសគីបែបនេះគឺជាទម្រង់មួយនៃការគោរពសក្ការៈ ហើយគាត់នឹងទទួលបានឋានៈខ្ពស់។ ព្យាការី ﷺ បាននិយាយថា៖ «មនុស្សដែលជាទីស្រឡាញ់បំផុតចំពោះអល់ឡោះ គឺជាអ្នកដែលផ្តល់ប្រយោជន៍ដល់អ្នកដទៃបំផុត»។ (ទុបរ៉នី ៖ ៦០២៦)
4. រក្សាតុល្យភាពរវាងការរកប្រាក់ចិញ្ចឹមជីវិតជាមួយនឹងតម្រូវការផ្ទាល់ខ្លួនផ្សេងទៀតទាំងអស់ ដើម្បីកុំឱ្យការប្រមូលទ្រព្យសម្បត្តិ ក្លាយជាគោលដៅចម្បងនៃជីវិត។ សាល់ម៉ានបាននិយាយទៅកាន់អាពូទើរទើថាៈ "ពិតប្រាកដណាស់ ម្ចាស់របស់អ្នកមានសិទ្ធិលើអ្នក រូបកាយរបស់អ្នកមានសិទ្ធិលើអ្នក ហើយគ្រួសាររបស់អ្នកមានសិទ្ធិលើអ្នក ដូច្នេះ ចូរផ្តល់អ្វីៗគ្រប់យ៉ាង និងសិទ្ធិរបស់ពួកគេទាំងអស់គ្នា។ គាត់បានទៅជួបព្យាការី ﷺ ហើយបានរៀបរាប់បែបនោះចំទៅកាន់ព្យាការី ﷺ ហើយលោកក៏បានមានប្រសាសន៍ថា៖ « អ្នកនិយាយត្រឹមត្រូវណាស់ សាល់ម៉ាន » ។ (ពូខរី ៖ ១៩៦៨)។
5. ផ្តល់ការទុកចិត្តលើអល់ឡោះក្នុងការស្វែងរក រ៉ីសគី៖ ដោយត្រូវប្រើមធ្យោបាយស្របច្បាប់នៅក្នុងការរកស៊ី រួមជាមួយនឹងដួងចិត្តរបស់គេត្រូវភ្ជាប់ទៅនឹងអល់ឡោះ (ដោយទំនុកចិត្ត)។
6. ត្រូវតែប្រាកដក្នុងចិត្តថា រ៉ីសគីរបស់គេបានមកពីអល់ឡោះតែមួយគត់ ដោយមិនមែនបានមកពីសមត្ថភាពខ្លួនឯងនោះទេ ព្រោះពេលខ្លះ គេបានប្រើមធ្យោបាយស្វែងរករ៉ីសគី តែក៏មិនបានសម្រេចដោយសារប្រាជ្ញាញាណ និងហេតុផល ដែលគ្មានអ្នកណាមួយអាចដឹងក្រៅពីទ្រង់នោះឡើយ។
7. ការស្កប់ចិត្តនឹងអ្វីដែលអល់ឡោះបានកំណត់ និងបានផ្តល់ឱ្យ។ អ្នកមូស្លីមត្រូវស្វែងរករ៉ីសគីដោយសុជីវធម៌ និងស្កប់ស្កល់ជាមួយនឹងអ្វីដែលអល់ឡោះបានកំណត់សម្រាប់គេ។ រកអ្វីដែលអល់ឡោះអនុញ្ញាត និងជៀសឱ្យឆ្ងាយពីអ្វីដែលត្រូវបានហាមឃាត់ ព្យាការី ﷺ មានប្រសាសន៍ថាៈ « ឱមនុស្សលោកទាំងឡាយអើយ! ចូរកោតខ្លាចអល់ឡោះ ហើយចូរមានកម្រិតមធ្យមក្នុងការស្វែងរករ៉ីសគី ដោយគ្មានអ្នកណាម្នាក់ដែលនឹងត្រូវស្លាប់នោះឡើយ រហូតដល់គេបានទទួលនូវរ៉ីសគីទាំងអស់ដែលអល់ឡោះបានកំណត់សម្រាប់គេជាមុនសិន ទោះបីជាពេលខ្លះមកយឺតក៏ដោយ។ ដូច្នេះ ចូរកោតខ្លាចអល់ឡោះ ហើយត្រូវមានកម្រិតមធ្យមក្នុងការស្វែងរករ៉ីសគី។ ចូរយករបស់ណាដែលគេអនុញ្ញាត ហើយទុករបស់ណាដែលគេហាមឃាត់ »។ (អិបនូ ម៉ាហ្ជះ ៖ ២១៤៤)។
