និយមន័យសឡាត

អត្ថន័យសឡាត ជាលក្ខណៈភាសា មានន័យថា៖ ការបួងសួង(ទូអា)។ សឡាត គឺជាការភ្ជាប់ទំនាក់ទំនងរវាងខ្ញុំបម្រើជាមួយនឹងម្ចាស់របស់គេដែលជាអ្នកដែលបង្កើតរូបគេ ដោយវាផ្ទុកដោយអត្ថន័យដ៏ខ្ពស់បំផុតនៃភាពជាខ្ញុំបម្រើ ការសុំការជ្រកកោនទៅកាន់អល់ឡោះជាម្ចាស់ ហើយនិងការសុំជំនួយពីទ្រង់ ដោយនៅក្នុងពេលសឡាតនោះ រូបគេបួងសួងសុំពីទ្រង់ សន្ទនាជាមួយទ្រង់ជាលក្ខណៈឯកជន និងហ្ស៊ីកៀររំឮកដល់ទ្រង់ ហើយគេនឹកឃើញពីធាតុពិតនៃទ្រង់ និងធាតុពិតនៃលោកិយដែលគេកំពុងរស់នៅ ហើយគេមានអារម្មណ៍ដឹងពីភាពធំធេងនៃទ្រង់ និងក្តីមេត្តាករុណារបស់ទ្រង់ចំពោះរូបគេ។ ជាមួយគ្នានេះដែរ សឡាតគឺជួយឱ្យមនុស្សមានការប្រកាន់ភ្ជាប់នូវច្បាប់បញ្ញត្តិរបស់អល់ឡោះ និងចាកឆ្ងាយពីការបំពាន ទង្វើអសីលធម៌ និងអំពើល្មើសផ្សេងៗ។ ដូចដែលអល់ឡោះជាម្ចាស់ទ្រង់បានមានបន្ទូលថា៖ “ពិតប្រាកដណាស់ សឡាតអាចហាមឃាត់អំពីការប្រព្រឹត្ដអសីលធម៌ និងអំពើទុច្ចរិត”។ (អាល់អាន់កាពូត៖៤៥)

១. វាជាគោលគ្រឹះទីពីរនៃគោលគ្រឹះទាំងប្រាំរបស់សាសនាឥស្លាម ដូចដែលព្យាការី ﷺ លោកបានមានប្រសាសន៍ថា៖ ”គេស្ថាបនាសាសនាឥស្លាមលើគោលគ្រឹះចំនួនប្រាំគឺ៖ ការធ្វើសាក្សីថា គ្មានទេម្ចាស់ដែលត្រូវគោរពសក្ការៈដ៏ពិតប្រាកដ គឺមានតែអល់ឡោះ ហើយមូហាំម៉ាត់ជាអ្នកនាំសាររបស់អល់ឡោះ ប្រតិបត្តិសឡាត...”។ (ពូខរី៖៨, មូស្លីម៖១៦)។ គោលគ្រឹះនៃរចនាសម្ព័ន្ធគឺជាគ្រឹះដែលអ្វីផ្សេងពឹងផ្អែកត្រូវពឹងផ្អែកលើវា ហើយមិនអាចឈរបានដោយគ្មានវានោះឡើយ។

ឧត្ដមភាពនៃការសឡាត

មានភស្តុតាងជាច្រើនពីគម្ពីរគួរអាន និងស៊ុណ្ណះដែលបានបញ្ជាក់ពីឧត្តមភាពនៃការសឡាតដែលមានដូចជា៖

១. សឡាតជម្រុះចោលនូវបាបកម្មទាំងឡាយ ដូចដែលព្យាការី ﷺ លោកបានមានប្រសាសន៍ថា៖ “សឡាតទាំងប្រាំពេល ពីជុមអាត់ (ថ្ងៃសុក្រ)មួយទៅជុមអាត់មួយ និងពីខែរ៉ម៉ាហ្ទនមួយទៅខែរ៉ម៉ាហ្ទនមួយទៀត វាជម្រុះចោលនូវបាបកម្មដែលនៅចន្លោះនោះ ដរាបណាគេជៀសវាងពីបាបកម្មធំៗ”។ (មូស្លីម៖២៣៣, តៀរមីហ្ស៊ី៖២១៤)

៣. វាជាទង្វើកុសលដែលគេយកមកជំនុំជម្រះចំពោះខ្ញុំបម្រើរបស់អល់ឡោះមុនគេនៅថ្ងៃបរលោក។ ដូចនេះ ប្រសិនបើសឡាតនោះបានល្អត្រឹមត្រូវ ហើយគេទទួលយក នោះទង្វើកុសលផ្សេងទៀតរបស់បុគ្គលនោះក៏ត្រូវគេទទួលយកដែរ។ តែប្រសិនបើគេបដិសេធមិនទទួលសឡាតរបស់បុគ្គលនោះទេនោះ នោះទង្វើកុសលផ្សេងទៀតរបស់បុគ្គលនោះក៏ត្រូវគេបដិសេធមិនទទួលយកដែរ ដូចដែលរ៉ស៊ូលុលឡោះ ﷺ លោកបានមានប្រសាសន៍ថា៖ “អ្វីដែលគេជំនុំជម្រះមុនគេក្នុងចំណោមទង្វើរបស់ខ្ញុំបម្រើអល់ឡោះនៅថ្ងៃបរលោកនោះ គឺការសឡាត។ ប្រសិនបើវា(សឡាត)ល្អត្រឹមត្រូវនោះ ពិតណាស់ទង្វើផ្សេងទៀតរបស់គេក៏ល្អត្រឹមត្រូវដែរ”។ (អាត់តប់រ៉នី៖១៨៥៩)

ពេលដែលគេសឡាត គឺជាពេលវេលាដ៏ផ្អែមល្ហែមបំផុតសម្រាប់អ្នកមានជំនឿ ខណៈដែលរូបគេសន្ទនានឹងម្ចាស់របស់គេក្នុងកំឡុងពេលដែលគេកំពុងតែសឡាតនោះ ដោយគេនឹងទទួលបាននូវភាពស្ងប់សុខ និងភាពនឹងនរខាងផ្លូវចិត្តពីអល់ឡោះជាម្ចាស់។

ហើយវាគឺជាសេចក្តីរីករាយបំផុតរបស់ព្យាការី ﷺ ដូចដែលគាត់បានមានប្រសាសន៍ថា៖ “ហើយសឡាតបានធ្វើឱ្យត្រជាក់ភ្នែករបស់ខ្ញុំ (ជាការលួងលោមចិត្តរបស់ខ្ញុំ)”។ (អាន់ណាសាអ៊ី ៖ ៣៩៤០)

ហើយព្យាការី ﷺ នៅពេលដែលលោកមានបញ្ហាណាមួយដែលធ្វើឱ្យលោកមានការខ្វល់ខ្វាយ ឬ រវល់ស្មុគស្មាញ នោះលោកនឹងតម្រង់ទៅប្រតិបត្តិសឡាត។ (អាពូហ្ទាវូទ៖១៣១៩)

អ្នកបានបញ្ចប់មេរៀនដោយជោគជ័យ