បន្តរៀន

អ្នកមិនបានចុះឈ្មោះចូលទេ
ចុះឈ្មោះឥឡូវនេះក្នុងវេបសាយ(តាក)ដើម្បីតាមដានភាពល្អប្រសើររបស់អ្នក ប្រមូលពិន្ទុ និងការចូលរួមក្នុងការប្រកួតប្រជែង បន្ទាប់ពីមានការចុះឈ្មោះរួចហើយ អ្នកនឹងទទួលបានវិញ្ញាបនបត្រអ៊ីនធឺណិតក្នុងប្រធានបទដែលអ្នកសិក្សាវា

ផ្នែកបច្ចុប្បន្ន model:

មេរៀន លក្ខខណ្ឌ និងក្បួនច្បាប់នៃការសឡាត

ចំពោះសឡាត គឺមានលក្ខខណ្ឌជាច្រើនដែលការប្រតិបត្តិសឡាតនោះនឹងមិនត្រឹមត្រូវឡើយ លុះត្រាតែគេបំពេញតាមនូវលក្ខខណ្ឌទាំងនោះ។ ដូចនេះ ចាំបាច់លើជនមូស្លីមត្រូវដឹងនូវលក្ខខណ្ឌទាំងនោះ។ នៅក្នុងមេរៀននេះ អ្នកនឹងសិក្សាអំពីលក្ខខណ្ឌ និងក្បួនច្បាប់នៃការសឡាត ហើយនិងទីកន្លែងសឡាត។

  • ដឹង​ពីលក្ខខណ្ឌនៃការសឡាត
  • ដឹងពីក្បួនច្បាប់នៃការសឡាត
  • យល់ដឹងពីក្បួនច្បាប់ទាក់ទងនឹងទីកន្លែងដែលត្រូវសឡាត

count: ចំនួនសិស្សផ្សេងទៀតដែលបានបញ្ចប់មេរៀននេះ។

លក្ខខណ្ឌនៃការសឡាត

១. មានភាពជ្រះស្អាត(មានទឹកវូហ្ទុ)

មានភាពជ្រះស្អាតអំពីហាហ្ទាស និងភាពកខ្វក់(ណាជិស)។ អាប់ទុលឡោះ ពិន អ៊ូមើរ រទអ បាននិយាយថា៖ ខ្ញុំបានឮរ៉ស៊ូលុលឡោះ ﷺ លោកបានមានប្រសាសន៍ថា៖ “អល់ឡោះជាម្ចាស់ទ្រង់មិនទទួលយកសឡាតដែលគ្មានភាពជ្រះស្អាត(គ្មានទឹកវូហ្ទុ)ឡើយ”។ (មូស្លីម៖២២៤)

២. បិទបាំងកេរខ្មាស

គឺត្រូវបិទបាំងកេរខ្មាសដោយសម្លៀកបំពាក់ដែលមិនអាចមើលឃើញរាងកាយរបស់គេដោយសារតែសម្លៀកបំពាក់នោះខ្លី ឬស្ដើង។

កេរខ្មាសរបស់បុរសដែលត្រូវបិទបាំង

ចាប់ពីផ្ចិតដល់ជង្គង់។

កេរខ្មាសរបស់ស្រ្តីក្នុងពេលសឡាត

ចំពោះស្ត្រីត្រូវបិទបាំងរាងកាយរបស់ខ្លួនទាំងមូល លើកលែងតែមុខ និងប្រអប់ដៃទាំងពីរ។ អំពី អាអ៊ីស្ហះ រទអ បាននិយាយថា៖ ព្យាការី ﷺ លោកបានមានប្រសាសន៍ថា៖ “អល់ឡោះមិនទទួលយកការសឡាតរបស់ស្ត្រីដែលមានរដូវ(គ្រប់អាយុ)នោះទេ លើកលែងតែបានបិទបាំងរាងកាយ”។ (អាពូហ្ទាវូទ៖៦៤១, តៀរមីហ្ស៊ី៖៣៧៧)

អល់ឡោះជាម្ចាស់ទ្រង់បានមានបន្ទូលថា៖ “ឱកូនចៅអាហ្ទាំ! ចូរពួកអ្នកលម្អសម្លៀកបំពាក់របស់ពួកអ្នកនៅរាល់ម៉ាស្ជិទ(ពេលសឡាត)”។ (អាល់អាក់រ៉ហ្វ៖៣១)។ ការបិទបាំងរាងកាយឲ្យបានជិត វាគឺជាកម្រិតទាបបំផុតនៃការតុបតែងកាយ”។

៣. តម្រង់ទៅកាន់គិបឡាត់

អល់ឡោះជាម្ចាស់ទ្រង់បានមានបន្ទូលថា៖ “ហើយគ្រប់កន្លែងដែលអ្នកចេញដំណើរ(ហើយអ្នកចង់សឡាត) ចូរអ្នកតម្រង់មុខរបស់អ្នកទៅកាន់ទិសម៉ាស្ជិទអាល់ហារ៉មចុះ”។ (អាល់ហ្ពាក៏រ៉ោះ៖១៤៩)

តើអ្វីទៅគិបឡាត់របស់ជនមូស្លីម?

គិបឡាត់របស់ជនមូស្លីម គឺកាក់ហ្ពះដ៏ឧត្ដុង្គឧត្ដមដែលត្រូវបានកសាងឡើងដោយបិតារបស់បណ្ដាព្យាការីទាំងឡាយ គឺព្យាការីអ៊ីព្រហ៊ីម អាឡៃហ៊ីស្សាឡាម ហើយបណ្ដាព្យាការីទាំងឡាយក៏បានបំពេញធម្មយាត្រាហាជ្ជីនៅទីនោះផងដែរ។ ពួកយើងដឹងថា វាគ្រាន់តែជាដុំថ្មប៉ុណ្ណោះដែលមិនអាចផ្តល់គ្រោះថ្នាក់ ឬផ្តល់ជាប្រយោជន៍អ្វីឡើយ ក៏ប៉ុន្តែអល់ឡោះទ្រង់បានបង្គាប់ប្រើពួកយើងឲ្យបែរតម្រង់ទិសទៅរកវានៅក្នុងពេលប្រតិបត្តិសឡាតដើម្បីបង្រួបបង្រួមអ្នកមូស្លីមទាំងអស់ឲ្យបែរទៅរកទិសដៅតែមួយ។

របៀបបែរតម្រង់ទៅរកទិសគិបឡាត់

ចាំបាច់(វ៉ាជិប)លើអ្នកមូស្លីមត្រូវបែរតម្រង់ទៅកាន់កាក់ហ្ពះតែម្តងប្រសិនបើគេមើលឃើញវានៅចំពោះមុខ។ តែប្រសិនបើគេនៅឆ្ងាយ គ្រប់គ្រាន់ហើយដោយគ្រាន់តែបែរតម្រង់ទៅរកទិសក្រុងម៉ាក្កះ។ ការល្អៀងបន្តិចបន្តួចពីទិសកាក់ហ្ពះ ក៏គ្មានបញ្ហាអ្វីនោះដែរ ដូចដែលព្យាការី ﷺ លោកបានមានប្រសាសន៍ថា៖ “រវាងទិសខាងកើត និងទិសខាងលិច គឺជាគិបឡាត់”។ (តៀរមីហ្ស៊ី៖៣៤២)

តើត្រូវធ្វើដូចម្ដេចចំពោះអ្នកដែលអសមត្ថភាពមិនអាចបែរតម្រង់ទៅកាន់ទិសគិបឡាត់បានដោយសារតែជំងឺ ឬក៏មានបញ្ហាផ្សេងៗទៀត?

ក្នុងករណីនេះ ការបែរតម្រង់ទៅកាន់ទិសគិបឡាត់លែងជាកាតព្វកិច្ចលើរូបគេទៀតហើយ ដូចដែលកាតព្វកិច្ចផ្សេងៗទាំងអស់ត្រូវបានលើកលែងពីរូបគេដោយសារការអសមត្ថភាពក្នុងការអនុវត្តវាដូចគ្នាដែរ។ អល់ឡោះជាម្ចាស់ទ្រង់បានមានបន្ទូលថា៖ “ដូច្នេះ ចូរពួកអ្នកកោតខ្លាចអល់ឡោះទៅតាមលទ្ធភាពរបស់ពួកអ្នក”។ (អាត់តាហ្គ៏ពុន៖១៦)

៤. ចូលដល់ពេលវេលាសឡាត

គឺជាលក្ខខណ្ឌមួយដើម្បីឲ្យសឡាតមានភាពត្រឹមត្រូវ។ ដូចនេះ ការសឡាតនឹងមិនត្រឹមត្រូវឡើយប្រសិនបើគេប្រតិបត្តិវាមុនពេលវេលារបស់វាចូលមកដល់ ហើយគេហាមឃាត់(ហារ៉ាំ)ចំពោះការពន្យារពេលសឡាតរហូតផុតពេលវេលារបស់វា ដូចដែលអល់ឡោះជាម្ចាស់ទ្រង់បានមានបន្ទូលថា៖ “ពិតណាស់ សឡាតជាកាតព្វកិច្ចមួយទៅលើបណ្ដាអ្នកមានជំនឿដែលមានពេលវេលាកំណត់យ៉ាងច្បាស់លាស់”។ (អាន់នីសាក៖១០៣)

ជាការប្រសើរ គប្បីប្រតិបត្តិសឡាតក្នុងពេលដំបូងរបស់វា(ដើមពេល)។ អំពី អ៊ុមមូ ហ្វារវ៉ះ រទអ បាននិយាយថា៖ មានគេសួររ៉ស៊ូលុលឡោះ ﷺ ថា៖ តើទង្វើអ្វីដែលល្អប្រសើរជាងគេ? លោកបានឆ្លើយថា៖ “គឺការសឡាតក្នុងពេលដំបូងរបស់វា”។ (អាពូហ្ទាវូទ៖៤២៦)

តើគេអនុញ្ញាតឲ្យពន្យាពេលសឡាតរហូតដល់ផុតពេលវេលារបស់វាដែរឬទេ?

ចាំបាច់ត្រូវប្រតិបត្តិសឡាតនៅក្នុងពេលវេលារបស់វា ហើយគេហាមឃាត់(ហារ៉ាំ)ចំពោះការពន្យារពេលសឡាតរហូតដល់ផុតពេលវេលារបស់វា លើកលែងតែក្នុងករណីដែលគេត្រូវផ្តុំគ្នារវាងសឡាតពីរ(ជម៉ក់)។

តើត្រូវធ្វើដូចម្ដេចចំពោះអ្នកដែលខកខានមិនបានសឡាតដោយសារគេងលក់ ឬភ្លេចភ្លាំង?

ចាំបាច់លើជននោះត្រូវប្រញាប់ប្រញាល់រួសរាន់ប្រតិបត្តិសឡាតនោះវិញនៅពេលណាដែលគេនឹកឃើញ។ អំពី អាណាស ពិន ម៉ាលិក រទអ បាននិយាយថា៖ ព្យាការីរបស់អល់ឡោះ ﷺ លោកបានមានប្រសាសន៍ថា៖ “ជនណាហើយភ្លេចសឡាត ឬគេងលក់មិនបានសឡាត ពិតណាស់ការផាកពិន័យចំពោះគេ គឺត្រូវសឡាតឡើងវិញនៅពេលដែលគេនឹកឃើញវា”។ (មូស្លីម៖៦៨៤)

ភាពជាកាតព្វកិច្ចនៃការសឡាត

កាតព្វកិច្ចសឡាតទៅលើជនមូស្លីមដែលមានប្រាជ្ញាស្មារតី គ្រប់អាយុ មិនមែនជាអ្នកដែលមានឈាមរដូវ ឬឈាមឆ្លងទន្លេ(នីហ្វាស)ព្រោះស្ត្រីមិនមានកាតព្វកិច្ចត្រូវសឡាតទេនៅក្នុងអំឡុងពេលមករដូវ ឬមានឈាមឆ្លងទន្លេនោះ ហើយក៏មិនចាំបាច់សឡាតសងវិញដែរបន្ទាប់ពីជ្រះស្អាតអំពីវា(ឈាមរដូវ ឬឈាមឆ្លងទន្លេ)។

គេកំណត់ថាគ្រប់អាយុនៅពេលដែលមានសញ្ញាណាមួយក្នុងចំណោមសញ្ញាខាងក្រោម៖

١
១. គ្រប់អាយុ១៥ឆ្នាំ
٢
២. មានដុះរោមជុំវិញប្រដាប់ភេទ
٣
៣. ចេញទឹកកាម មិនថាក្នុងដំណេក ឬក្រៅដំណេក
٤
៤. មានរដូវ ឬមានផ្ទៃពោះ

សឡាតដែលជាកាតព្វកិច្ចទាំងប្រាំ និងពេលវេលារបស់វា

អល់ឡោះជាម្ចាស់ទ្រង់បានដាក់កាតព្វកិច្ចលើជនមូស្លីមឲ្យប្រតិបត្តិសឡាតមួយថ្ងៃមួយយប់ចំនួនប្រាំដង។ វាជាសសរគ្រឹះនៃសាសនាឥស្លាម ហើយគេបានកំណត់ពេលវេលារបស់វាដូចខាងក្រោម៖

សឡាតហ្វាជើរ ឬសឡាតស៊ូពុស

មានចំនួនពីររ៉ក្អាត់។ ពេលវេលារបស់វា ចាប់ផ្ដើមពីពេលសេតរុណ(ហ្វាជើរ)រះ គឺការចាប់ផ្ដើមនៃពន្លឺពណ៌សនៅឯជើងមេឃនាទិសខាងកើត រហូតដល់ថ្ងៃរះ។

សឡាតហ៊្សូហូរ

មានចំនួនបួនរ៉ក្អាត់។ ពេលវេលារបស់វា ចាប់ផ្ដើមពីពេលថ្ងៃជ្រេ(ព្រះអាទិត្យជ្រេទៅទិសខាងលិចក្រោយពីវានៅនឹងចំពីលើមេឃ) រហូតដល់ពេលដែលស្រមោលនៃវត្ថុអ្វីមួយមានប្រវែងស្មើនឹងប្រវែងដើមនៃវត្ថុនោះវិញ។

សឡាតអាសើរ

មានចំនួនបួនរ៉ក្អាត់។ ពេលវេលារបស់វា ចាប់ផ្ដើមពីពេលផុតពេលវេលាសឡាតហ្ស៊ូហូរ គឺនៅពេលដែលស្រមោលនៃវត្ថុអ្វីមួយមានប្រវែងស្មើនឹងប្រវែងដើមនៃវត្ថុនោះ រហូតដល់ថ្ងៃលិច។ អ្នកមូស្លីមគប្បីរួសរាន់ប្រតិបត្តិសឡាតនេះមុនពេលដែលពន្លឺព្រះអាទិត្យចុះខ្សោយ ហើយប្រែទៅជាពណ៌លឿង។

សឡាតម៉ាហ្រ្គិប

មានចំនួនបីរ៉ក្អាត់។ ពេលវេលារបស់វា ចាប់ផ្ដើមពីពេលព្រះអាទិត្យលិចបាត់ពីជើងមេឃ រហូតដល់ពេលដែលពន្លឺពណ៌ក្រហមដែលកើតមានបន្ទាប់ពីព្រះអាទិត្យលិចនោះបានបាត់អស់ពីជើងមេឃនាទិសខាងលិច។

សឡាតអ៊ីស្ហា

មានចំនួនបួនរ៉ក្អាត់។ ពេលវេលារបស់វា ចាប់ផ្ដើមពីពេលដែលពន្លឺពណ៌ក្រហម(នៅទិសខាងលិច)លិចបាត់ រហូតដល់ពាក់កណ្ដាលយប់ ឬរហូតដល់សេតារុណ(ហ្វាជើរ)រះក្នុងករណីចាំបាច់។

ទីកន្លែងសឡាត

សាសនាឥស្លាមបានបង្គាប់ប្រើបុរសឲ្យប្រតិបត្តិសឡាតជាលក្ខណៈរួមគ្នា(ជើម៉ាអះ) ហើយជំរុញឲ្យប្រតិបត្តិសឡាតនៅម៉ាស្ជិតដើម្បីឲ្យវាក្លាយជាវេទិកា ឬកន្លែងជួបជុំសម្រាប់អ្នកមូស្លីមដែលធ្វើឲ្យចំណងមិត្តភាព ភាតរភាព និងការស្រលាញ់រាប់អានគ្នារវាងពួកគេមានការកើនឡើង ហើយការប្រតិបត្តិសឡាតជាលក្ខណៈរួមគ្នានេះទៀតសោត គឺទទួលបានផលបុណ្យច្រើនជាងការប្រតិបត្តិសឡាតម្នាក់ឯងជាច្រើនកម្រិត ដូចដែលព្យាការី ﷺ លោកបានមានប្រសាសន៍ថា៖ “សឡាតរួមគ្នា(ជើម៉ាអះ)ល្អប្រសើរជាងសឡាតម្នាក់ឯងចំនួន២៧កម្រិត”។ (ពូខរី៖៦៤៥, មូស្លីម៖៦៥០, អះម៉ាត់៖៥៩២១ ។

គោលការណ៍ទាក់ទងនឹងកន្លែងសឡាត

សាសនាឥស្លាមបានដាក់លក្ខខណ្ឌចំពោះកន្លែងដែលគេត្រូវប្រតិបត្តិសឡាតនោះ គឺត្រូវតែជាកន្លែងដែលជ្រះស្អាតមិនកខ្វក់។ អល់ឡោះជាម្ចាស់ទ្រង់បានមានបន្ទូលថា៖ “ហើយយើងបានបញ្ជាចំពោះអ៊ីព្រហ៊ីម និងអ៊ីស្មាអែលថា៖ ចូរអ្នកទាំងពីរសម្អាតកាក់ហ្ពះរបស់យើងសម្រាប់បណ្ដាអ្នកតវ៉ាហ្វ បណ្ដាអ្នកអៀកទីកាហ្វ និងបណ្ដាអ្នករូកុ ស៊ូជូតទាំងឡាយ”។ (អាល់ហ្ពាក៏រ៉ោះ៖១២៥)

ជាគោលការណ៍ គ្រប់កន្លែងទាំងអស់ គឺជ្រះស្អាត

ជាគោលការណ៍ដើម គ្រប់កន្លែងទាំងអស់ គឺជ្រះស្អាត ហើយភាពកខ្វក់(ណាជិស)ទើបតែកើតឡើងនាពេលក្រោយប៉ុណ្ណោះ។ ដូចនេះ ប្រសិនបើអ្នកមិនបានដឹងថា នៅទីនោះមានប្រការកខ្វក់(ណាជិស)ទេនោះ គឺគេកំណត់ថាកន្លែងនោះ ជ្រះស្អាត។ ហើយគេអនុញ្ញាតឲ្យប្រតិបត្តិសឡាតនៅគ្រប់កន្លែងដែលជ្រះស្អាតទាំងអស់ ហើយមិនគប្បីដាក់បន្ទុកលើខ្លួនឯងក្នុងការនាំយកនូវកម្រាល ឬក្រណាត់ក្រាលសឡាត ឬក៏មិនសឡាតឡើយ លើកលែងតែមានវានោះទេ។

មានគោលការណ៍ទូទៅមួយចំនួនទាក់ទងនឹងកន្លែងសឡាតដែលអ្នកប្រតិបត្តិសឡាតត្រូវពិនិត្យមើល មានដូចជា៖

១. ចំពោះកន្លែងដែលគេសឡាតនោះ គឺមិនត្រូវធ្វើឲ្យរំខាន ឬប៉ះពាល់ដល់មនុស្សនោះទេ ដូចជាអ្នកដែលសឡាតនៅតាមផ្លូវធ្វើដំណើរ ឬកន្លែងដែលមានមនុស្សដើរកាត់ ឬកន្លែងដែលគេហាមឃាត់មិនឲ្យឈប់ដោយសារតែធ្វើឲ្យរំខាន ឬកកស្ទះទៅដល់មនុស្សជាដើម។ ព្យាការី ﷺ លោកបានហាមឃាត់អំពីការរំខាន ឬបង្កគ្រោះថ្នាក់ មិនថាចំពោះខ្លួនឯង ឬអ្នកដទៃឡើយ ដូចដែលលោកបានមានប្រសាសន៍ថា៖ “ចូរកុំបង្កគ្រោះថ្នាក់ដល់ខ្លួន និងអ្នកដទៃ”។ (អ៊ិពនូម៉ាហ្ជះ៖២៣៤១, អះម៉ាត់៖២៨៦៥)

២. សឡាតដែលគេសឡាតនោះ គឺមិនត្រូវមាននូវអ្វីដែលរំខានដល់អ្នកសឡាតឡើយ ដូចជារូបភាព សំឡេងរំខានខ្លាំង ឬកន្លែងដែលមានចម្រៀងតន្រ្តីជាដើម។

៣. ពុំមែនជាកន្លែងដែលគេប្រព្រឹត្តប្រការខុសឆ្គង ដូចជាក្លឹបរាត្រីជាដើម ហើយការសឡាតនៅកន្លែងនេះ គឺមិនគប្បីនោះឡើយ។

អ្នកបានបញ្ចប់មេរៀនដោយជោគជ័យ


ចាប់ផ្តើមប្រឡង