ជំនឿចំពោះបណ្តាព្រះនាម និងលក្ខណៈសម្បត្តិរបស់អល់ឡោះ

គម្ពីរគួរអានបានសង្ក់តធ្ងន់លើការណែនាំខ្ញុំបម្រើអល់ឡោះឲ្យស្គាល់ព្រះជាម្ចាស់របស់ពួកគេ ដែលជាអ្នកបង្កើតពួកគេ និងបានលើកឡើងដដែលៗអំពីបញ្ហានេះនៅក្នុងវាក្យខណ្ឌជាច្រើននៃគម្ពីរគួរអាន ពីព្រោះវាចាំបាច់ណាស់សម្រាប់ជនមូស្លីមក្នុងការស្គាល់ព្រះជាម្ចាស់របស់ខ្លួនតាមរយៈបណ្តាព្រះនាមទាំងឡាយរបស់អល់ឡោះដ៏ល្អប្រពៃ និងលក្ខណៈសម្បត្តិដ៏ឧត្តុង្គឧត្តមរបស់ទ្រង់។ ទាំងនេះគឺដើម្បីឲ្យខ្ញុំបម្រើរបស់ទ្រង់បានយល់ច្បាស់អំពីការគោរពសក្ការៈទៅចំពោះទ្រង់ ស្របទៅតាមព្រះនាម និងលក្ខណៈសម្បត្តិរបស់ទ្រង់ និងទទួលឥទ្ធិពលពីវានៅក្នុងជីវិតរស់នៅ និងការគោរពសក្ការៈរបស់គេ។

ដូច្នេះ អ្នកមូស្លីមត្រូវមានជំនឿចំពោះអ្វីដែលអល់ឡោះជាម្ចាស់ទ្រង់ទទួលស្គាល់ដោយខ្លួនទ្រង់ផ្ទាល់នៅក្នុងគម្ពីរបស់ទ្រង់ ឬនៅក្នុងស៊ុណ្ណះ(មាគ៌ា)អ្នកនាំសាររបស់ទ្រង់ នៃបណ្តាព្រះនាម និងលក្ខណៈសម្បត្តិរបស់ទ្រង់ក្នុងលក្ខណៈដែលសក្តិសមនឹងទ្រង់ដ៏មហាខ្ពង់ខ្ពស់។

សម្រាប់អល់ឡោះជាម្ចាស់ ទ្រង់មានព្រះនាមជាច្រើនដ៏ល្អប្រពៃ និងលក្ខណៈសម្បត្តិដ៏ពេញលេញជាច្រើន ហើយគ្មានអ្វីមួយដែលអាចមកប្រដូចនឹងបណ្តាព្រះនាម និងលក្ខណៈសម្បត្តិរបស់ទ្រង់នោះឡើយ ដូចដែលអល់ឡោះជាម្ចាស់ទ្រង់បានមានបន្ទូលថា៖ “គ្មានអ្វីមកប្រដូចនឹងទ្រង់បានឡើយ។ ហើយទ្រង់មហាឮ មហាឃើញ”។ (អាស្ហ ស្ហ៊ូរ៉៖១១)។ ដូច្នេះ អល់ឡោះជាម្ចាស់ទ្រង់បរិសុទ្ធ ជ្រះស្អាតអំពីការប្រៀបប្រដូចពីសំណាក់អ្វីមួយនៃភាវៈទាំងឡាយដែលទ្រង់បានបង្កើត ចំពោះបណ្តានាម និងលក្ខណៈសម្បត្តិទាំងអស់របស់ទ្រង់។

តទៅនេះ យើងនឹងបង្ហាញនូវបណ្តាព្រះនាមមួយចំនួនរបស់អល់ឡោះជាម្ចាស់៖

អើររ៉ោះម៉ាន អើររ៉ោះហ៊ីម (ជាម្ចាស់មហាសប្បុរស មហាអាណិតស្រឡាញ់)

ព្រះនាមទាំងពីរនេះ គឺជានាមដែលអល់ឡោះជាម្ចាស់ទ្រង់បានយកវាទាំងពីរមកចាប់ផ្តើមគម្ពីររបស់ទ្រង់ និងជានាមដំបូងគេដែលទ្រង់ណែនាំពីខ្លួនរបស់ទ្រង់ផ្ទាល់ទៅកាន់ខ្ញុំបម្រើទាំងឡាយរបស់ទ្រង់ ហើយក៏ជានាមដែលចាប់ផ្តើមដំបូងគេនៅគ្រប់ស៊ូរ៉ោះទាំងអស់នៃគម្ពីរគួរអានផងដែរ គឺ “بسم الله الرحمن الرحيم” (ក្នុងនាមអល់ឡោះ មហាសប្បុរស មហាអាណិតស្រឡាញ់) លើកលែងតែស៊ូរ៉ោះ អាត់តាវហ្ពះ ប៉ុណ្ណោះ។

ពិតប្រាកដណាស់ ម្ចាស់របស់យើងបានកំណត់ជ្រើសរើសលើខ្លួនរបស់ទ្រង់ផ្ទាល់នូវក្តីមេត្តាករុណា។ ហើយក្តីមេត្តាករុណារបស់ទ្រង់ គឺទូលំទូលាយគ្របដណ្តប់អ្វីៗទាំងអស់ រហូតធ្វើឲ្យសត្វលោកទាំងឡាយមានក្តីមេត្តាករុណាចំពោះគ្នាទៅវិញទៅមក ម្តាយមានក្តីមេត្តាចំពោះកូន។ ទ្រង់បានសម្រួលនូវចំណីអាហារទៅចំពោះភាវៈទាំងឡាយដែលទ្រង់បង្កើតមក ដែលវាបង្ហាញពីឥទ្ធិពលនៃសេចក្តីមេត្តាករុណារបស់ទ្រង់ទៅចំពោះសត្វលោករបស់ទ្រង់ ដូចដែលទ្រង់បានមានបន្ទូលថា៖ “ដូចេ្នះ ចូរអ្នកពិចារណាមើលទៅលើឥទ្ធិពលនៃក្ដីមេត្ដាករុណារបស់អល់ឡោះ តើទ្រង់ធ្វើឱ្យដីរស់(មានជីជាតិ)បន្ទាប់ពីវាស្លាប់(គ្មានជីជាតិ)យ៉ាងដូចមេ្ដច”។ (អើររ៉ូម៖៥០)

អំពី អ៊ូមើរ ពិន អាល់ខត្ដប រទអ ថា៖ គេបាននាំឈ្លើយសឹកមកជួប ព្យាការី ﷺ ហើយនៅក្នុងចំណោមឈ្លើយសឹកទាំងនោះ មានស្ដ្រីម្នាក់ដែលរត់ចុះឡើង(រកកូន)។ នៅពេលដែលនាងឃើញកូនរបស់នាង នាងបានស្ទុះទៅបីវាដាក់ផ្អឹបដើមទ្រូង និងបំបៅវា។ ពេលនោះ ព្យាការី ﷺ លោកបានសួរពួកយើងថា៖ “តើពួកអ្នកគិតថា ស្ដ្រីម្នាក់នេះនឹងបោះកូនរបស់នាងទៅក្នុងភ្លើងឬទេ”? ពួកយើងបានឆ្លើយថា៖ សូមស្បថនឹងអល់ឡោះ! នាងពិតជាមិនបោះកូនចូលទៅក្នុងភ្លើងឡើយ ខណៈដែលនាងមានលទ្ធភាពការពារវានោះ។ លោកបានតបថា៖ អល់ឡោះពិតជាមានក្តីមេត្តាចំពោះខ្ញុំបម្រើទាំងឡាយរបស់ទ្រង់ជាងស្ដ្រីម្នាក់នេះស្រលាញ់ចំពោះកូនរបស់នាងទៅទៀត”។ (រាយការណ៍ដោយ អាល់ពូខរី ៖ ៥៩៩៩ និងមូស្លីម ៖ ២៧៥៤)

ក្តីមេត្តាករុណារបស់អល់ឡោះមានពីរប្រភេទ៖

ពិតណាស់ ព្យាការី ﷺ លោកបានមានប្រសាសន៍ថា៖ “គ្មានអ្នកណាម្នាក់អាចចូលឋានសួគ៌ដោយសារតែទង្វើកុសលរបស់ខ្លួននោះឡើយ”។ ពួកគេបានសួរថា៖ ឱរ៉ស៊ូលុលឡោះ! សូម្បីតែលោកឬ? លោកបានឆ្លើយថា៖ “សូម្បីតែខ្ញុំក៏ដោយ គ្រាន់តែ(សម្រាប់ខ្ញុំ)អល់ឡោះបានគ្របដណ្តប់ខ្ញុំដោយក្តីមេត្តាករុណារបស់ទ្រង់ប៉ុណ្ណោះ”។ (ពូខរី៖៦៤៦៧, មូស្លីម៖២៨១៨)

កាលណាខ្ញុំបម្រើអល់ឡោះគោរពប្រតិបត្តិចំពោះទ្រង់កាន់តែខ្លាំង ហើយគេកាន់តែបញ្ជិតខ្លួន និងឱនលំទោនទៅចំពោះព្រះជាម្ចាស់របស់គេកាន់តែខ្លាំង នោះចំណែកនៃក្តីមេត្តាករុណា និងការអាណិតស្រឡាញ់នៃទ្រង់មកចំពោះគេក៏កាន់តែធំទៅតាមនោះផងដែរ ដូចដែលទ្រង់បានមានបន្ទូលថា៖ “ពិតប្រាកដណាស់ ការអាណិតស្រឡាញ់របស់អល់ឡោះ គឺនៅជិតនឹងបណ្ដាអ្នកដែលសាងអំពើល្អ”។ (អាល់អាក់រ៉ហ្វ៖៥៦)

អាស្សាមៀក អាល់ហ្ពាសៀរ (ទ្រង់មហាឮ មហាឃើញ)

ពិតប្រាកដណាស់ អល់ឡោះជាម្ចាស់ទ្រង់ស្តាប់ឮនូវរាល់សំឡេងទាំងអស់ ទោះជាភាសា និងតម្រូវការផ្សេងៗគ្នា ទោះជានិយាយដោយសម្លេងស្ងាត់ៗ ឬខ្លាំងៗក៏ដោយ។ នៅពេលដែលពួកល្ងង់ខ្លៅមួយចំនួនគិតថា អល់ឡោះជាម្ចាស់ទ្រង់មិនឮនូវអ្វីដែលពួកគេនិយាយគ្នាស្ងាត់ៗ ខ្សឹបខ្សៀវគ្នាទេនោះ អល់ឡោះជាម្ចាស់ក៏បានបញ្ចុះនូវបន្ទូលរបស់ទ្រង់ដ៏មហាខ្ពង់ខ្ពស់ដោយស្តីបន្ទោសទៅកាន់ពួកគេថា៖ “ឬមួយពួកគេគិតថា ពិតប្រាកដណាស់ យើងមិនស្ដាប់ឮនូវ ការសម្ងាត់របស់ពួកគេ និងការខ្សឹបខ្សៀវរបស់ពួកគេទេឬ? មិនដូច្នោះទេ។ តាមពិត យើងស្ដាប់ឮ ហើយអ្នកនាំសារ(ម៉ាឡាអ៊ីកាត់)របស់យើងដែលនៅជាមួយពួកគេកំពុងតែកត់ត្រា(រាល់ទង្វើរបស់ពួកគេ)”។ (អាសហ្សុខរុហ្វ៖៨០)

អល់ឡោះជាម្ចាស់ទ្រង់ទតឃើញនូវគ្រប់អ្វីៗទាំងអស់ ទោះបីជាវាមានទំហំតូចល្អិតយ៉ាងណាក៏ដោយ ក៏គ្មានភាពអាថ៌កំបាំងណាមួយអាចលាក់បាំងពីទ្រង់បានដែរ។ ពិតណាស់ព្យាការី អ៊ីព្រហ៊ីម បានបដិសេធចំពោះឪពុករបស់គាត់ដែលគោរពសក្ការៈទៅចំពោះរូបបដិមា ដែលស្តាប់មិនឮ និងមើលមិនឃើញអ្វីសោះនោះ ដោយគាត់បាននិយាយដូចដែលបានលើកឡើងនៅក្នុងគម្ពីរគួរអានថា៖ “ឱឪពុករបស់ខ្ញុំ! ហេតុអ្វីបានជាលោកឪពុកគោរពសក្ការៈចំពោះអ្វីដែលស្ដាប់មិនឮ និងមើលមិនឃើញ ហើយនិងមិនអាចផ្ដល់ផលប្រយោជន៍អ្វីដល់លោកឪពុកទាល់តែសោះនោះទៅវិញ”? (ម៉ារយ៉ាំ៖៤២)

នៅពេលដែលខ្ញុំបម្រើអល់ឡោះដឹងថា ពិតណាស់ អល់ឡោះជាម្ចាស់ទ្រង់មហាឮ និងមហាទតឃើញបំផុតដោយគ្មានអ្វីមួយអាចលាក់បាំងនឹងទ្រង់បានឡើយ សូម្បីតែវត្ថុដ៏តូចបំផុតនៅលើមេឃ និងនៅលើផែនដីក៏ដោយ ហើយទ្រង់ដឹងនូវរឿងសម្ងាត់ និងប្រការអាថ៌កំបាំងទាំងឡាយ នោះគេនឹងដឹងច្បាស់ពីការឃ្លាំមើលរបស់អល់ឡោះជាម្ចាស់។ ដូចនេះ គេនឹងរក្សាអណ្តាតរបស់គេពីការនិយាយកុហក និងការនិយាយដើមអ្នកដទៃ, រក្សាអវៈយវៈរបស់គេ និងបញ្ចៀសចិត្តរបស់គេអំពីអ្វីដែលធ្វើឲ្យអល់ឡោះខឹងសម្បា ហើយប្រើប្រាស់ឧបការគុណ និងសមត្ថភាពទាំងនោះក្នុងប្រការដែលអល់ឡោះទ្រង់ស្រឡាញ់ និងពេញចិត្ត ពីព្រោះទ្រង់ទតឃើញទាំងអស់ទាំងអ្វីដែលគេលាក់បាំង ទាំងអ្វីដែលគេលាតត្រដាង ទាំងខាងក្នុង និងខាងក្រៅ។ ហេតុនេះហើយទើបព្យាការី ﷺ លោកបានមានប្រសាសន៍ថា៖ អៀហសាន(អំពើល្អ)នោះគឺ អ្នកត្រូវគោរពសក្ការៈចំពោះអល់ឡោះហាក់ដូចជាអ្នកមើលឃើញទ្រង់ ទោះបីជាជាក់ស្តែងអ្នកមិនបានមើលឃើញទ្រង់ តែអ្នកត្រូវជឿជាក់ថា ទ្រង់កំពុងមើលឃើញអ្នក”។ (ពូខរី៖៤៧៧៧, មូស្លីម៖៩)

អត្ថន័យនៃព្រះនាមរបស់អល់ឡោះ “អាល់ក័យយូម” (ឥតពឹងអាស្រ័យលើអ្វីទាំងអស់) គឺបង្ហាញទៅលើពីរប្រការ៖

ហេតុផលនេះ ការរួមបញ្ចូលគ្នានៃព្រះនាមដ៏អស្ចារ្យទាំងពីរនេះ ក៏ក្លាយជាឃ្លាមួយដ៏ពិសេសមួយនៅក្នុងការទូអាបួងសួងរបស់ព្យាការី ﷺ នោះគឺ៖ "يا حي ياقيوم برحمتك أستغيث" មានន័យថា៖ “ឱម្ចាស់ដែលមានជីវិតអមតៈ! ឱម្ចាស់ដែលឥតពឹងអាស្រ័យលើអ្វីទាំងអស់! ដោយក្តីមេត្តាករុណារបស់ទ្រង់ រូបខ្ញុំសូមសុំនូវជំនួយពីទ្រង់”។ (តៀរមីហ្ស៊ី៖៣៥២៤)

ផ្លែផ្កានៃជំនឿចំពោះបណ្តាព្រះនាម និងលក្ខណៈសម្បត្តិរបស់អល់ឡោះ