Ɓangaren yanzu model
Darasi Riba
Allah Mai girma da ɗaukaka cikin hikimarShi ya hukunta Riba da ta kasance cikin manya-manyan zunuban da aka haramta su a cikin shari'ar Musulunci, kuma lalle an haramtawa Al-ummun da suka rigaye mu ma; saboda masifa da bala'in dake cikinta akan Al-umma da kuma ɗaiɗaikun mutane, Allah Ta'ala Yace:(To, saboda zalumci daga waɗanda suka tuba (Yahudawa) Muka haramta musu abubuwa masu daɗi, waɗanda aka halatta su a gare su, kuma saboda yawan tusherwarsu ga hanyan Allah * Da karɓansu ga riba alhali kuma an hane su daga gare ta...) (Annisa'i: 160,161).
Kuma daga cikin ababen da suke bayyana haɗarin Riba, tsawatarwa mai tsananin da yazo a cikin ta, Allah Mai girma da ɗaukaka Yace: (Yã ku waɗanda suka yi ĩmãni! Ku bi Allah da taƙawa kuma ku bar abin da ya rage daga riba, idan kun kasance mãsu ĩmãni (279) To, idan ba ku aikata ba to, ku sani fa da akwai yãƙi daga Allah da ManzonSa. Kuma idan kun tũba to kuna da asalin dũkiyõyinku, bã ku zãlunta, kuma bã a zãluntar ku) (Albakara: 278,279); Sai Allah Maɗaukaki Ya hana cin Riba Ya haramta ta, Ya kuma yiwa ma'abocinta alƙawarin yaƙi.
Kuma Annabi tsira da amincin Allah su tabbata a gare shi ya tabbatar da haramcinta da tsawatarwa mai tsanani a kanta, daga Jabir Allah Ya kara mishi yarda yace: "Manzon Allah tsira da amincin Allah su tabbata a gare shi ya tsinewa maciyin riba, da wanda ya ciyar da ita, da wanda ya rubuta ta, da waɗanda suka shaida ta, sai yace: dukkansu ɗaya ne" (Muslim: 1598).
Ma'anan Riba
Riba a harcen larabci: Ita ce Ƙaruwa da bunƙasa, daga cikin hakan kuma akwai faɗin Allah Ta'ala: (Domin wata Al-umma ta kasance ta girmi wata Al-ummah)(Alnahl: 92), Ma'ana ta fita yawan adadi.
Ma'anan Riba
Amma kuma ma'anan riba a shari'a shi ne fifiko tsakanin abubuwa, da kuma ƙari a cikin wasu abubuwa, a cikin wasu ababe na musamman waɗanda shari'a ta haramta su.
Nau'ukan Riba
Riban fadali
Shi ne ƙari akan abubuwan da nassi yazo akansu, da kuma ababen da suke da alaƙa da su, kuma ƙarin yana kasancewa ne a cikin canza dukiyan riba da wani dukiyan riba na daga jinsinshi; Kaman siyar da mudun dabino ɗaya mai kyau da mudu biyu na dabino mara kyau.
Riban Nasi'ah
Yana kasancewa ne da ƙarin lokaci cikin ababen da ya kamata su shiga hannu, shi ne jinkirta sallamawa cikin sayar da dukkanin jinsi biyun waɗanda suka haɗu a cikin riban fadali; Kaman sayar da mudun shinkafa da mudun alkama tare da jinkirta sallamawa.
Hukuncin Riba
Riba haramun ne a cikin Alkur'ani da Sunnah da kuma ijma'in malamai. Annawawi Allah Yayi mishi rahama yace: "Dukkanin Musulmai sun haɗu a bisa haramcin riba da kuma cewa lalle ita tana daga cikin manya-manyan zunubai" (Almajmu'u: 9/391).
Hikimar haramta riba
1. Ƙarfafa harkan kasuwanci na gaske: Domin maciyin riba ba zaiyi amfani da dukiyarshi wajen samar da abunda zai amfane shi da kuma Al-ummah ba; wajen noma, ko kiwo, ko sana'a, ko kasuwanci ko wanin haka.
2. Hana nema ba tare da maye gurbi ba: Domin Musulunci babu shakka ya tsara harkokin kuɗi ta yadda ɓangarori biyu duka zasu amfana, saboda haka kowa daga cikinsu zai bayar da wani abu kuma zai karɓi wani abu a madadinshi, kuma ba a samun irin wannan a harkar riba.
3. Lalle riba tana yanke kyautatawa a tsakanin mutane: Kuma hakan ya saɓawa manufar shari'a wajen yaɗa kyautatawa da alheri a tsakanin mutane.
4. Hana amfani da wani: Domin mai bayarwa a koda yaushe yana amfani ne da buƙatar wanda yake baiwa; sai ya bashi akan tsarin riba.
5. Hana zalumci: Domin riba zalumci ne ga ɓangare ɗaya, Kuma Allah Ya haramta zalumci da dukkanin nau'ukanshi.
Cutarwan Riba
Cutarwan riba da haɗarinta suna da yawan gaske, kuma sun faɗaɗa domin su shafi dukkanin ɓangarorin rayuwan ɗaiɗaikun mutane da kuma na Al-ummah baki ɗaya.
1- Cutarwa akan halaye da ruhi
Maciyin riba zai zamto mara tausayi, mai kaushin zuciya, mai bautawa kudi; Sakamakon haka sai ya halattawa kanshi zalumtar mutane, da amfani da lokutan bukatunsu, da rauninsu da kuma talaucinsu. Da hakan ne zai karya zuciyar mabuƙacin dukiyarshi, sai ranshi yayi mishi ƙunci da ma duniya baki ɗaya.
Riba abu ne wanda yake rusa Al-ummah ta yadda zai mayar da ita a watse kuma a ɗaiɗaice; Mai ƙarfi yana cin mara ƙarfi, kuma babu wanda zai taimaki ɗan uwanshi sai dai domin maslaharshi.
3. Cutarwa akan Kasuwanci
Riba zai iya kaiwa ga rusa tsarin kasuwanci ta kowana ɓangare; sai bashuka su taru akan mutane, sai samar da ababen amfani yayi baya a cikin Al-ummah.
