Bakayi rajistan shiga ba

Kayi rajista yanzu a cikin dandalin Taa domin ka fara karatu da kuma bibiyan ci gabanka tare da tara maki domin samun damar shiga gasa bayan yin rajistan

Darasi Sallah A Bisa Mamaci Da Kuma Binne Shi

Yiwa Mamaci Sallah haƙƙi ne daga cikin haƙƙokan musulmai a bisa junansu, kuma yana daga cikin alamun karrama musulmi na zahiri a cikin Musulunci. A cikin wannan darasin zaka san wasu daga cikin hukunce-hukuncen Sallar gawa da kuma binne shi.

Sanin yadda ake sallar gawa
Sanin wasu hukunce-hukuncen binnewa

Count Wani dalibiku kammala wannan darasin

An fassara wannan darasin da yaruka masu zuwa:

አማርኛ العربية বাংলা English Español Français हिन्दी Bahasa Indonesia ភាសាខ្មែរ 한국어 Luganda മലയാളം नेपाली Oromoo پښتو Português සිංහල Kiswahili தமிழ் తెలుగు Tagalog Uyƣurqə / ئۇيغۇرچە اردو Tiếng Việt 中文

Hukuncin Sallan Gawa

Sallan jana'iza tana wajaba ne akan dukkanin musulmai waɗanda suke nan ba wai akan kowana ɗaya daga cikinsu ba, domin ita farali ne na kifaya ta yadda idan wasunsu suka sallace shi to sallar ta faɗi akan waɗanda basu samu sun sallace shi ba, kuma lalle Manzon Allah ya yiwa wanda ya sallaci gawa albishir da lada mai girman gaske, yace: "Duk wanda ya halarci sallar gawa har aka mata sallah ya kasance yana da lada kimanin Ƙiraɗi, kuma wanda ya halarce ta har aka binneta yana da lada kimanin Ƙiraɗi biyu». sai akace menene Ƙiraɗi kuma? sai yace:? Misalin manya-manyan duwatsu guda biyu» (Bukhari: 1325, Muslim: 945).

Falalan halartan Jana'iza

Halartan jana'iza da rakata yanada fa'idodi masu yawa, mahimmansu: Sauƙe haƙƙin mamaci ta hanyar sallatanshi, da nema mishi ceto, da yi mishi Addu'a, da sauƙe haƙƙin mutanenshi, da ƙarfafa musu gwiwa a cikin musibar rashin ɗan uwansu, da samun lada mai yawa ga wanda yayi rakiya, da samun wa'azi da abun la'akari da ganin gawa da maƙabarta da wanin haka.

Yadda Ake Sallar Jana'iza

1. Anaso a gudanar da sallar jana'iza a cikin jama'a kuma liman zai gabata akan mamu tamkar yadda ake yin sallar jama'a.

2. Za a sanya gawar a tsakanin masu sallah da Alkiblah, kuma liman zai tsaya a daidai kanshi, Mace kuma a tsakiyanta, kaman yadda yazo daga Annabi tsira da amincin Allah su tabbata a gare shi (Abu Dawood: 3194).

3. Sallar jana'iza tana da kabbarori guda huɗu kaman haka:

Kabbara ta farko

Mai sallah zaiyi kabbara ta farko yana mai ɗaga hannayenshi zuwa kafaɗunshi ko zuwa dab da kunnuwanshi, sa'annan sai ya ɗaura hannunshi na dama akan na hagu a bisa ƙirjinshi kuma ba zai yi addu'ar budɗe sallah ba, sai ya nemi tsari daga shaidan, yayi basmalah, sai ya karanta Suratul Fatiha a asirce.

Kabbara ta biyu

Sai yayi kabbara ta biyu yayi salati a bisa Annabi Muhammadu tsira da amincin Allah su tabbata a gare shi da kowana irin sigar salati kaman yace: Allahumma salli wa sallim ala nabiyyina Muhammad, idan kuma yazo da cikakken salati wanda mai sallah yake karantawa a tahiyar ƙarshe da shi yafi, kuma siffanshi shi ne: (Allahumma salli ala Muhammad wa ala ãli Muhammad kama sallaita ala Ibrahim wa ala ãli Ibrahim Innaka Hamidun Majid, Allahumma barik ala Muhammad wa ala ãli Muhammad kama barakta ala Ibrahim wa ala ãli Ibrahim Innaka Hamidun Majid).

Kabbara ta uku

Sa'annan sai yayi kabbara ta uku, a bayanta kuma sai ya nemawa mamaci rahama da gafara da Aljannah, da kuma ɗaukaka gwargwadon ikonshi, idan kuma ya kasance ya haddace wasu Addu'o'in da suka fito daga Manzon Allah tsira da amincin Allah su tabbata a gare shi a cikin haka da hakan yafi.

Kuma daga cikin Addu'ar da tazon: "Ya Allah Ka gafarta mishi Ka ji ƙanshi, Ka bashi lafiya Ka mishi ahuwa, Ka girmama masaukƙinshi, Ka yalwata mashiganshi, Ka wanke shi da ruwa da ƙanƙara da kuma sanyi, Ka tsarkake shi daga kura kurai da zunubai kaman yadda Ka tsarkake farin kaya daga dauɗa, Kuma Ka canza mishi gidan da yafi gidanshi alheri, da mutanen da sukafi mutanenshi alheri, da matan da tafi matanshi alheri, Ka shigar da shi Aljannah Ka kuma Ka kare shi daga azaban kabari ko azabar wuta" (Muslim: 963).

Kabbara ta huɗu

Sa'annan sai yayi kabbara ta hudu sai ya ɗan tsaya kaɗan a bayanta, sa'annan sai yayi sallama ta damanshi kawai.

Wurin da ake sallan Jana'iza

Ya halalta ayi sallar jana'iza a cikin masallaci ko a wani wuri na musamman wanda aka tanada domin hakan a wajen masallaci kuma akan iya yi ma a cikin Maƙabarta, domin hakan duka sunzo daga Annabi tsira da amincin Allah su tabbata a gare shi.

Ɗaukan mamaci da raka shi

Sunnah ita ce gaggawa wajen kintsa mamaci, da sallatanshi, da tafiya da shi zuwa Maƙabarta, da kuma binne shi. Daga Abu Hurairah Allah Ya kara mishi yarda daga Annabi tsira da amincin Allah su tabbata a gare shi yace: «Kuyi gaggawa da gawa zuwa makoncinta, idan ta kasance ta gari ce to kuna gabatar da ita zuwa ga alheri ne, idan kuma ta kasance koma bayan haka ne to sharri ne kuke ɗauke da shi akan kafaɗunku». (Bukhari: 1315, Muslim: 944).

Anason wanda ya raka gawa da yayi tarayya wajen ɗaukanta, kuma maza ne suke ɗaukan gawa banda mata, kuma anason masu tafiyan ƙafa su kasance a bayanta da kuma a gabanta, idan kuma maƙabartan ta kasance tana da nisa sosai, ko za a wahala wajen kai ta da ƙafa, to babu laifi idan aka ɗauketa akan abun hawa ko a cikin mota.

Ababen da ya kamata a lura dasu yayin binne mamaci

Anaso ayi gaggawa wajen binne mamaci bayan wanke shi da sanya masa likafani da sallatanshi.

Anaso kabarin yayi zurfi ya kuma yi faɗi gwargwadon buƙata ta yadda warin shi bazai iya fitowa ba koda ya ruɓe, kuma ta yadda namomin daji mafarauta ba zasu iya tono shi ba, kuma ta yanda ruwan sama ma ba zai iya tafiya da shi ba.

Kabari zai iya kasance a bisa siffar Lahad ko kuma a bisa siffat Shaƙ, kuma kowana gari da abunda ya dace dasu dubi da yanayin ƙasarsu da kuma taurinta.

Anaso a kwantar da mamaci a bisa ɓangarenshi na dama a kuma fiskantar da shi zuwa Alkiblah.

Anaso wanda zai binne mamaci yace yayin kwantar da shi a cikin kabarin: "Da sunan Allah da Allah kuma a bisa tafarkin Manzon Allah" (Attirmizi: 1046, Ibnu Majah: 1550).

Ya kamata a rufe wurin da aka kwantar da mamacin koda ace kabarin lahad ne ko Shaƙ ne da tukunya (Abu ne wanda ake ƙerashi da yumbu sai a barshi ya bushe yayi ƙarfi), ko da itatuwa, ko kuma da duwatsu gabanin zuba ƙasa akanshi.

Anaso wanda ya halarta da yayi tarayya wajen tura taɓo akan mamacin kuma lalle Annabi tsira da amincin Allah su tabbata a gare shi ya tura taɓo akan wani mamaci sau uku da hannayenshi (Addarul kuduni: 1565).

Anaso a ɗaga kabari kimanin taku daya domin a gane shi, saboda mutane su nisanci cutar dashi ko tafiya akanshi, kuma an haramta wuce gona da iri a cikin hakan ta hanyan gini akan kabari, kuma haƙiƙa hani akan haka yazo daga Annabi; domin hakan hanya ne na girmama mamacin kuma zai iya kaiwa ga shirka da Allah Mai girma da ɗaukaka.

Abunda ke bayan binnewa

Anaso waɗanda suka halarci binne mamaci da su roƙawa mamacin tabbata da gafara bayan an binne shi, domin haƙiƙa Annabi tsira da amincin Allah su tabbata a gare shi ya kasance idan aka kammala binne mamaci sai ya tsaya akanshi yana mai cewa: "Ku naimawa ɗan uwanku gafara kuma ku roƙa mishi tabbata, domin yanzu haka ana tambayanshi" (Abu Dawood: 3221).

Haƙiƙa ka kammala wannan darasin cikin nasara

Ka fara jarrabawa

Canza yare

Ka ci gaba da karatu

Recently viewed

Recent Members

Darrusa