సాధారణంగా శీతాకాలంలో వెలిగించే నిప్పును నిద్రపోయే ముందు ఆర్పేయడం అవసరం. అదే విధంగా అగ్నిప్రమాదాలకు దారితీసే హీటర్ల వంటి పరికరాల విషయంలో కూడా ఇలాగే జాగ్రత్త వహించాలి. అబూ మూసా అల్ అష్అరీ(ర) వారు ఉల్లేఖించారు: మదీనాలో ఒక రాత్రి ఒక ఇల్లు అందులోని వారితో సహా అగ్నికి ఆహుతైపోయింది. వారి పరిస్థితి గురించి దైవప్రవక్త ముహమ్మద్(స) వారికి తెలపగా, వారు ఇలా సెలవిచ్చారు: "నిశ్చయంగా ఈ అగ్ని మీకు ఒక శత్రువు వంటిది, కావున మీరు నిద్రించేటప్పుడు దానిని ఆర్పేయండి" (బుఖారీ 6294, ముస్లిం 2016). మరొక ఉల్లేఖనంలో దైవప్రవక్త ముహమ్మద్(స) వారు ఇలా సెలవిచ్చారు: "మీరు నిద్రపోయేటప్పుడు మీ ఇళ్ళలో మంటలను ఆర్పకుండా వదిలివేయకండి" (బుఖారీ 6293, ముస్లిం 2015).

గాలిని రకరకాలుగా మలచడంలో అల్లాహ్ కు ఉన్న శక్తి సామర్థ్యాలను గుర్తుంచుకోవాలి. గాలులు వేడిగా లేదా చల్లగా ఉండవచ్చు, నెమ్మదిగా లేదా ఉధృతంగా వీయవచ్చు, ఉత్తర లేదా దక్షిణ దిశల నుండి రావచ్చు. కొన్ని గాలులు వర్షాన్ని కురిపించేవిగా ఉంటే, మరికొన్ని ఏ ప్రయోజనం లేనివిగా (శుష్కమైనవిగా) ఉంటాయి. అల్లాహ్ ఇలా సెలవిచ్చాడు: భూమ్యాకాశాల సృష్టిలో, రేయింబవళ్ళ (నిరంతర) మార్పిడిలో, ప్రజలకు లాభం చేకూర్చే వస్తువులను మోసుకుంటూ సముద్రాలలో నడిచే ఓడలలో, ఆకాశం నుండి అల్లాహ్ కురిపించే నీటిలో, దాని ద్వారా మృతప్రాయమైన భూమికి ప్రాణం పోయడంలో (బతికించడంలో), ఇంకా అందులో అన్ని రకాల ప్రాణులను వ్యాపింపజేయడంలో, వీచే గాలుల దిశల మార్పులో, భూమ్యాకాశాల మధ్య (దేవుని) నియమ నిబంధనలకు కట్టుబడి పయనిస్తున్న మేఘాలలో విజ్ఞానవంతులకు (దేవుని శక్తి సామర్థ్యాలకు సంబంధించిన) ఎన్నో సూచనలున్నాయి. (అల్-బఖరా 164).

అబ్దుల్లా బిన్ జుబైర్(ర) వారు ఉరుము శబ్దాన్ని విన్నప్పుడు మాటలాడటం ఆపి ఇలా అనేవారు: (సుబ్'హానల్లదీ యుసబ్బిహుర్రాదు బిహమ్దిహీ వల్ మలాయికతు మిన్ ఖీఫతిహీ)."మెరుపులు ఆయనను స్తుతిస్తూ పవిత్రతను కొనియాడుతున్నాయి, అలాగే దైవదూతలు కూడా ఆయన పట్ల ఉన్న భయభక్తులతో ఆయనను కీర్తిస్తున్నారు. ఈ వాక్యాలు ఖుర్ఆన్ లోనివి: “ఉరుము సయితం ఆయన పవిత్రతను కొనియాడుతోంది, ఆయన్ని ప్రశంసిస్తోంది. దూతలు కూడా ఆయన భీతివల్ల ఆయన్ని స్తుతిస్తున్నారు. ఆయన పిడుగులను పంపి, తాను కోరిన వారిపై పడవేస్తున్నాడు. అవిశ్వాసులు అల్లాహ్ విషయంలో పిడివాదానికి దిగుతున్నారు! ఆయన మహా శక్తిమంతుడు! (అర్ రాద్: 13).

అల్లాహ్ వర్షాన్ని శుభప్రదమైనదిగా అభివర్ణిస్తూ ఇలా సెలవిచ్చాడు: (మరియు మేము ఆకాశం నుండి శుభప్రదమైన నీటిని కురిపించాము) (ఖాఫ్: 9). వర్షం కురిసేటప్పుడు చేయవలసిన పనులలో ఒకటి: వర్షపు జల్లులు శరీరాన్ని తాకేలా ఒంటిపై ఉన్న వస్త్రాన్ని కొద్దిగా తొలగించడం. అనస్(ర) వారు ఇలా ఉల్లేఖించారు: "మేము దైవప్రవక్త ముహమ్మద్(స) వారితో ఉన్నప్పుడు వర్షం కురిసింది. అప్పుడు దైవప్రవక్త ముహమ్మద్(స) వారు తమ వస్త్రాన్ని కొద్దిగా పక్కకు జరిపారు, దానివల్ల వర్షపు చినుకులు వారి శరీరాన్ని తాకాయి. అప్పుడు మేము: 'ఓ అల్లాహ్ ప్రవక్త! మీరు ఎందుకు ఇలా చేశారు?' అని అడిగాము. దానికి వారు: ‘ఎందుకంటే ఇది ఇప్పుడే తన ప్రభువు వద్ద నుండి వస్తోంది’ అని సెలవిచ్చారు" (ముస్లిం 898).

2. దుఆ చేయడం(వేడుకోవడం); వర్షం కురిసే సమయం దుఆలు అంగీకరించబడే సమయమని అనేక ఉల్లేఖనాల ద్వారా తెలుస్తోంది.

వర్షం అధికమై దానివల్ల నష్టం కలుగుతుందని భయపడినప్పుడు, చేతులు పైకెత్తి ఇలా దుఆ చేయడం సున్నత్: "అల్లాహుమ్మ హవాలైనా వలా అలైనా, అల్లాహుమ్మ అలల్ ఆకామి వజ్ జిరాబి, వ బుతూనిల్ ఔదియతి, వ మనాబితిష్షజరి". (ఓ అల్లాహ్! మా చుట్టుపక్కల కురిపించు, మాపై (నష్టం కలిగించేలా) కాదు. ఓ అల్లాహ్! కొండలపై, గుట్టలపై, లోయలలో మరియు చెట్లు మొలిచే చోట్ల కురిపించు). (బుఖారీ 1014, ముస్లిం 897).