ప్రస్తుత విభాగం : model
పాఠం వదూ
వుదూ యొక్క విశిష్టత
వుదూ మరియు శుద్ధి ముస్లిము యొక్క అంతస్తులను పెంచే అత్యుత్తమ కార్యాలలో ఒకటి. ఒక దాసుడు అల్లాహ్ నుండి ప్రతిఫలాన్ని ఆశిస్తూ, చిత్తశుద్ధితో వుదూ చేసినప్పుడు అల్లాహ్ అతని పాపాలను మరియు తప్పులను క్షమిస్తాడు. దైవప్రవక్త ముహమ్మద్(స) వారు ఈ విధంగా సెలవిచ్చారు: "ఒక ముస్లిము (విశ్వాసి) వుదూ చేస్తూ తన ముఖాన్ని కడుక్కున్నప్పుడు, అతను తన కళ్లతో చూసిన ప్రతి పాపం నీటితో పాటు లేదా నీటి చివరి బొట్టుతో పాటు అతని ముఖం నుండి తొలగిపోతుంది. అతను తన చేతులను కడుక్కున్నప్పుడు, అతని చేతులు చేసిన ప్రతి పాపం నీటితో పాటు లేదా నీటి చివరి బొట్టుతో పాటు అతని చేతుల నుండి తొలగిపోతుంది. అతను తన పాదాలను కడుక్కున్నప్పుడు, అతని పాదాలు నడిచిన ప్రతి పాపం నీటితో పాటు లేదా నీటి చివరి బొట్టుతో పాటు అతని పాదాల నుండి తొలగిపోతుంది. చివరికి అతను పాపాల నుండి పూర్తిగా పరిశుద్ధుడై బయటపడతాడు" (ముస్లిం 244).
నేను వుదూ ఎలా చేయాలి మరియు చిన్న అశుద్ధతను -హదస్ అల్ అస్గర్ -ఎలా తొలగించుకోవాలి?
సంకల్పం
ముస్లిము వుదూ చేయాలనుకున్నప్పుడు దానికి సంబంధించిన నియ్యత్ (సంకల్పం) చేసుకోవాలి. అంటే అశుద్ధతను తొలగించుకోవాలనే ఉద్దేశ్యంతో మనసులో మరియు మెదడులో దృఢ నిశ్చయం చేసుకోవాలి. ప్రవక్త ముహమ్మద్(స) వారు "కర్మలన్నీ సంకల్పం పైనే ఆధారపడి ఉంటాయి" (బుఖారీ 1, ముస్లిం 1907) అని సెలవిచ్చినట్లుగా, అన్ని ఆచరణలకు సంకల్పం ఒక నిబంధన. ఆ తర్వాత ఒక అంగం కడిగిన వెంటనే మరొకటి కడుగుతూ, మధ్యలో ఎక్కువ విరామం ఇవ్వకుండా ఈ క్రింది వరుస క్రమంలో వుదూ ప్రారంభించాలి.
రెండు అరచేతులను నీటితో మూడు సార్లు కడగడం ఉత్తమం
నీటితో పుక్కిలించాలి, అంటే నీటిని నోటిలోకి తీసుకుని లోపల కదిలించి బయటకు ఉమ్మివేయాలి. ఇలా మూడు సార్లు చేయడం సున్నత్ (శ్రేష్ఠం), ఒక్కసారి చేయడం వాజిబ్ (తప్పనిసరి).
ఇస్తెన్షాఖ్: అంటే ముక్కు ద్వారా నీటిని లోపలికి పీల్చుకోవడం, ఆ తర్వాత ఇస్తెన్సార్: అంటే ముక్కు నుండి గాలిని బయటకు వదులుతూ ఆ నీటిని వెలుపలికి పంపడం. దీనిని లోతుగా (ముక్కు చివరి వరకు వెళ్లేలా) చేయడం శ్రేష్ఠం, అయితే దాని వల్ల నష్టం కలిగినా లేదా ఉపవాసంతో ఉన్నా అలా చేయకూడదు. ఇలా మూడు సార్లు చేయడం సున్నత్ (శ్రేష్ఠం), ఒక్కసారి చేయడం వాజిబ్ (తప్పనిసరి).
ముఖాన్ని కడుక్కోవాలి. దీని హద్దులు - నుదురు పైభాగం (జుట్టు మొలిచే చోటు) నుండి గడ్డం కింది వరకు మరియు ఒక చెవి నుండి మరొక చెవి వరకు. రెండు చెవులు ముఖంలో భాగం కావు. ఇలా మూడు సార్లు చేయడం శ్రేష్ఠం, ఒక్కసారి చేయడం వాజిబ్ (తప్పనిసరి).
చేతి వేళ్ళతో సహా రెండు మోచేతుల వరకూ కడుక్కోవడం, మోచేతుల భాగాలు పూర్తిగా తడవడం తప్పనిసరి, మొదటగా కుడిచేతిని కడుగుకోవడం అభిలషణీయం, ఈ విధంగా మూడు సార్లు కడుగుకోవాలి, ఒక సారి చేయడం తప్పనిసరి.
మసహ్ చేయడం అనగా రెండు హస్తాలను నీటితో తడుపుకుని, వాటితో నుదుటి నుండి మొదలుపెట్టి తల వెనుకభాగం వెంట్రుకలు ముగిసే, మెడ మొదలయ్యే అంచు వరకు వెంట్రుకలను తాకుతూ పోనిచ్చి మళ్ళీ తిరిగి వెంట్రుకలను తాకుతూ నుదుటి వరకూ తీసుకురావడం. ఇలా ఒకసారి చేయాలి. ఇతర భాగాలవలే మూడు మూడు సార్లు చేయడం అనేది లేదు.
తలను సరచిన (మసహ్ చేసిన) తర్వాత, రెండు చూపుడు వేళ్లను చెవులలోకి ఉంచి, రెండు బొటనవేళ్లతో చెవుల వెనుక భాగాన్ని సరచాలి.
రెండు పాదాలను చీలమండల వరకు కడగాలి. పిక్క మరియు పాదం కలిసే చోట రెండు వైపులా బయటకు కనిపిస్తూ ఉండే ఎముకలనే చీలమండలు అంటారు. కడగడం కుడి కాలితో ప్రారంభించాలి. మూడు సార్లు కడగడం ఉత్తమం (ముస్తహబ్), అయితే ఒకసారి కడగడం అనివార్యం (వాజిబ్). ఒకవేళ సాక్సులు ధరించి ఉంటే, కొన్ని నిబంధనలకు లోబడి వాటిపై మసహ్ (తడి చేత్తో తుడవడం) చేయడానికి అనుమతి ఉంది.
