ផ្នែកបច្ចុប្បន្ន model:
មេរៀន សឡាតជើម៉ាអះ(រួមគ្នា)
អល់ឡោះជាម្ចាស់ទ្រង់បានដាក់បទបញ្ជាលើបុរសមូស្លីមឲ្យប្រតិបត្តិសឡាតទាំងប្រាំពេលជាលក្ខណៈរួមគ្នា(ជើម៉ាអះ)។ ពិតណាស់ មានភស្តុតាងជាច្រើនដែលបញ្ជាក់ពីឧត្ដមភាព និងផលបុណ្យដ៏ធំធេងរបស់វា។ ព្យាការី ﷺ លោកបានមានប្រសាសន៍ថា៖ “សឡាតជើម៉ាអះ(រួមគ្នា) ល្អប្រសើរជាងសឡាតម្នាក់ឯងចំនួន២៧កម្រិត”។ (ពូខរី៖៦៤៥, មូស្លីម៖៦៥០)
ចំនួនតិចបំផុតនៃសឡាតជើម៉ាអះ គឺពីរ(២)នាក់៖ អ៊ីម៉ាំម្នាក់ ហើយនិងម៉ាក់មុមម្នាក់។ កាលណាសឡាតជើម៉ាអះមានគ្នាកាន់តែច្រើន អល់ឡោះជាម្ចាស់ទ្រង់កាន់តែស្រលាញ់ពេញចិត្ត។
អត្ថន័យការតាមអ៊ីម៉ាំ
គឺការដែលអ្នកសឡាតដែលជាម៉ាក់មុមភ្ជាប់សឡាតរបស់ខ្លួនជាមួយអ៊ីម៉ាំ ដោយធ្វើតាមអ៊ីម៉ាំនៅក្នុងការរូកុ និងការស៊ូជោតរបស់ខ្លួន ហើយនៅស្ងៀមស្តាប់អ៊ីម៉ាំសូត្រ និងមិនធ្វើអ្វីមួយមុនអ៊ីម៉ាំ ឬធ្វើខុសពីអ៊ីម៉ាំនូវអ្វីមួយនោះឡើយ។ ផ្ទុយទៅវិញ គ្រប់ទង្វើទាំងអស់ គឺត្រូវធ្វើបន្ទាប់ពីអ៊ីម៉ាំភ្លាម។
ការតាមអ៊ីម៉ាំ
ព្យាការី ﷺ លោកបានមានប្រសាសន៍ថា៖ “ពិតប្រាកដណាស់ គេបង្កើតអ៊ីម៉ាំដើម្បីឲ្យម៉ាក់មុមធ្វើតាម។ ហេតុនេះ នៅពេលដែលអ៊ីម៉ាំតឹកពៀរ ចូរពួកអ្នកតឹកពៀរ ហើយពួកអ្នកមិនត្រូវតឹកពៀរនោះទេ រហូតទាល់តែអ៊ីម៉ាំតឹកពៀរ។ ហើយនៅពេលដែលអ៊ីម៉ាំឱនរូកុ ចូរពួកអ្នកឱនរូកុ ហើយពួកអ្នកមិនត្រូវឱនរូកុនោះទេ រហូតទាល់តែអ៊ីម៉ាំរូកុ។ ហើយនៅពេលដែលអ៊ីម៉ាំសូត្រថា៖ سمع الله لمن حمده ចូរពួកអ្នកសូត្រថា៖ربنا ولك الحمد ។ ហើយនៅពេលដែលអ៊ីម៉ាំក្រាបស៊ូជោត ចូរពួកអ្នកស៊ូជោត ហើយពួកអ្នកមិនត្រូវក្រាបស៊ូជោតនោះឡើយ ទាល់តែអ៊ីម៉ាំស៊ូជោត”។ (ពូខរី៧៣៤, មូស្លីម៖៤១១, អាពូហ្ទាវូត៖៦០៣)
អ្នកដែលត្រូវធ្វើជាអ៊ីម៉ាំមុនគេ គឺអ្នកដែលទន្ទេញគម្ពីរគួរអាន និងអ្នកដែលសូត្របានល្អជាងគេ។ បន្ទាប់មក តាមលំដាប់ជាបន្តបន្ទាប់មកទៀត ដូចដែលព្យាការី ﷺ លោកបានមានប្រសាសន៍ថា៖ “អ្នកដែលត្រូវជាធ្វើអ៊ីម៉ាំ(ដឹកនាំសឡាត)នៃក្រុមមួយ គឺអ្នកដែលសូត្រគម្ពីររបស់អល់ឡោះ(គម្ពីរគួរអាន)ល្អជាងគេ។ ប្រសិនបើពួកគេសូត្រល្អដូចគ្នា គឺត្រូវយកអ្នកដែលចេះដឹងពីស៊ុណ្ណះច្រើនជាងគេ”។ (មូស្លីម៖៦៧៣)
គប្បីលើអ៊ីម៉ាំត្រូវឈរនៅខាងមុខ ហើយម៉ាក់មុមត្រូវរៀបជាជួរនៅពីក្រោយអ៊ីម៉ាំ ហើយត្រូវបំពេញជួរ(សាហ្វ)នីមួយៗឲ្យពេញជាបន្តបន្ទាប់។ ប្រសិនបើម៉ាក់មុមមានតែម្នាក់ គឺត្រូវឈរនៅខាងស្ដាំអ៊ីម៉ាំ។
ជនណាហើយដែលមិនបានចូលសឡាតក្នុងពេលដំបូងជាមួយអ៊ីម៉ាំ គឺចាំបាច់លើគេត្រូវចូលសឡាតជាមួយអ៊ីម៉ាំ(នៅពេលដែលគេទៅដល់) រហូតដល់អ៊ីម៉ាំបានឲ្យសាឡាម។ បន្ទាប់មក គេត្រូវបំពេញសងវិញនូវអ្វីដែលនៅសេសសល់អំពីសឡាតរបស់ខ្លួនដែលគេទៅមិនទាន់។ រ៉ក្អាត់ដែលគេចូលសឡាតជាមួយអ៊ីម៉ាំក្នុងពេលដំបូង រាប់ថាជាការចាប់ផ្តើមនៃការសឡាតរបស់គេ ហើយអ្វីដែលគេធ្វើ បន្ទាប់ពីអ៊ីម៉ាំបញ្ចប់ការសឡាតនោះ ចាត់ទុកជាការសឡាតដែលនៅសល់ដែលគេត្រូវបំពេញឱ្យបានចប់ខ្លួនឯង។
ជនណាបានទាន់រូកុជាមួយអ៊ីម៉ាំ គឺគេចាត់ទុកថា រូបគេបានទាន់មួយរ៉ក្អាត់ពេញ ហើយជនណាដែលមិនទាន់រូកុជាមួយអ៊ីម៉ាំ គឺគេចាត់ទុកថារូបគេមិនបានទាន់រ៉ក្អាត់នេះ ក៏ដូចជារ៉ក្អាត់មុនៗឡើយ។ ដូចនេះ ចាំបាច់លើគេត្រូវចូលសឡាតជាមួយអ៊ីម៉ាំ(នៅពេលដែលគេទៅដល់) ហើយនៅពេលណាដែលអ៊ីម៉ាំបានឲ្យសាឡាម គឺគេត្រូវក្រោកឈរបំពេញសងវិញនូវអ្វីដែលនៅសេសសល់អំពីសឡាតរបស់ខ្លួនដែលរូបគេទៅមិនទាន់នោះ។
ឧទាហរណ៍ចំពោះអ្នកដែលទៅមិនទាន់សឡាតពីដំបូងជាមួយអ៊ីម៉ាំ
ជនណាដែលទៅទាន់ជាមួយអ៊ីម៉ាំនៅក្នុងសឡាតហ្វាជើរនៅរ៉ក្អាត់ទីពីរ គឺចាំបាច់លើគេត្រូវក្រោកឈរដើម្បីបំពេញរ៉ក្អាត់ដែលគេទៅមិនទាន់នោះបន្ទាប់ពីអ៊ីម៉ាំឲ្យសាឡាមរួច ហើយគេមិនត្រូវឲ្យសាឡាមនោះទេ រហូតដល់គេបំពេញរ៉ក្អាត់នោះរួច ព្រោះថាសឡាតហ្វាជើរមានចំនួនពីររ៉ក្អាត់ ហើយគេទៅទាន់តែមួយរ៉ក្អាត់ប៉ុណ្ណោះ។
ជនណាដែលទៅទាន់ជាមួយអ៊ីម៉ាំខណៈដែលអ៊ីម៉ាំកំពុងស្ថិតនៅក្នុងការអង្គុយតះយិតចុងក្រោយនៃសឡាតម៉ាហ្គ្រិប គឺចាំបាច់លើគេត្រូវសឡាតចំនួនបីរ៉ក្អាត់ពេញបន្ទាប់ពីអ៊ីម៉ាំឲ្យសាឡាមរួច ព្រោះថារូបគេទៅទាន់អ៊ីម៉ាំខណៈដែលអ៊ីម៉ាំកំពុងស្ថិតនៅក្នុងការអង្គុយតះយិតចុងក្រោយទៅហើយ ហើយគេចាត់ទុកថាទាន់រ៉ក្អាត់ លុះត្រាតែគេទាន់រូកុជាមួយអ៊ីម៉ាំ។
ជនណាដែលទៅទាន់ជាមួយអ៊ីម៉ាំនៅរ៉ក្អាត់ទីបីនៃសឡាតហ្ស៊ូហូរ ពិតណាស់ រូបគេបានទាន់ពីររ៉ក្អាត់ជាមួយអ៊ីម៉ាំ(សម្រាប់ម៉ាក់មុម គឺគេចាត់ទុកវាថាជាពីររ៉ក្អាត់ដំបូងនៃសឡាតហ្ស៊ូហូរ)។ ដូច្នេះ នៅពេលដែលអ៊ីម៉ាំឲ្យសាឡាម ចាំបាច់លើគេត្រូវក្រោកឈរបំពេញនូវអ្វីដែលនៅសេសសល់ ពោលគឺពីររ៉ក្អាត់ទៀត គឺរ៉ក្អាត់ទីបី និងរ៉ក្អាត់ទីបួន ពីព្រោះសឡាតហ្ស៊ូហូរ ជាសឡាតដែលមានបួនរ៉ក្អាត់។
