ఇస్లాంలో ఈద్ అనేది ఒక ముఖ్యమైన రోజు. ఈ రోజున ముస్లిములందరూ అల్లాహ్ కు కృతజ్ఞతలు తెలుపుతూ, ఆయనకు ధన్యవాదాలు తెలుపుతూ, ఆయన ఆరాధనను పూర్తి చేసినందుకు ఆనందం వ్యక్తం చేస్తారు. పండుగ రోజున ఈ ఆచరణలు చేయడం మంచిది: అందరితో ఆనందం పంచుకోవడం, అందమైన దుస్తులు ధరించడం, అవసరమైన వారికి సహాయం చేయడం, ధర్మబద్ద మార్గాల్లో ఆనందించడం, అల్లాహ్ అనుగ్రహాలను గుర్తుంచుకోవడం వగైరా.

ఇది ఇస్లాంలో చాలా ప్రాముఖ్యత కలిగిన నమాజు. ఈద్ రోజున పురుషులు, స్త్రీలు, పిల్లలు అందరూ ఈ నమాజులో పాల్గొనాలని ఇస్లాం నొక్కి చెప్పింది. ఈ నమాజు యొక్క సమయం సూర్యోదయం తర్వాత ఒక బల్లెమంత ఎత్తులో సూర్యుడు ఉన్నప్పుడు నుండి మధ్యాహ్నం జవాల్ సమయం మొదలయ్యే వరకు ఉంటుంది.

ఈద్ నమాజు రెండు రెకాతులు కలిగి ఉంటుంది. ఈ నమాజులో ఇమామ్ ఖురాన్ ను బిగ్గరగా చదువుతాడు. నమాజు తర్వాత రెండు ఖుత్బాలు (ప్రసంగం) ఉంటాయి. ప్రతి రెకాతు ప్రారంభంలో, ఇమామ్ అదనపు తక్బీర్లు (అల్లాహు అక్బర్) చదువుతాడు. మొదటి రెకాతులో ఖురాన్ చదవడానికి ముందు ఆరు తక్బీర్లు చదువుతాడు. రెండవ రెకాతులో సజ్దా నుండి లేచిన తర్వాత ఐదు తక్బీర్లు చదువుతాడు.

యువకులు, వృద్ధులు, పురుషులు మరియు స్త్రీలు ధర్మబద్ద విధానంలో ఆనందాన్ని పంచుకోవాలి, ఉన్న దుస్తులలో అన్నింటికన్నా మంచి దుస్తులు ధరించాలి, ఆ రోజున ఉపవాసం ఉండకుండా తినడం అనేది ఆరాధనగా పరిగణింపబడినది, పండుగ రోజున ఉపవాసం ఉండడం నిషేదించబడినది.

ఈద్ అల్ ఫిత్ర్ సందర్భంగా తక్బీర్ చెప్పడం ఆదేశించబడింది. రమదాన్ మాసం పూర్తి చేసుకున్న సందర్భంగా, ఈద్ సందర్భంగా ఆనందాన్ని వ్యక్తపరచడానికి, అల్లాహ్ అనుగ్రహం మరియు మార్గదర్శకత్వానికి కృతజ్ఞతలు తెలియజేయడానికి తక్బీర్ చెబుతారు. తన వచనంలో అల్లాహ్ ఇలా సెలవిస్తున్నాడు : “ఇది మీరు ఉపవాస దినాల సంఖ్యను పూర్తి చేయగలగడానికి మరియు మీకు సన్మార్గం చూపినందుకు, మీరు అల్లాహ్ మహనీయతను (ఘనతను) కొనియాడటానికి మరియు మీరు కృతజ్ఞతలు తెలుపుకోవటానికి”! (అల్-బఖరా: 185) ఈద్ అల్ అద్’హా సందర్భంగా ఆనందాన్ని వ్యక్తపరచడానికి, హజ్ యాత్రను పూర్తి చేసుకున్న హాజీలకు అభినందనలు తెలియజేయడానికి, ధుల్ హిజ్జా నెలలో పది రోజుల పాటు సదాచారణలు చేసే అవకాశం దక్కినందుకు అల్లాహ్ కు కృతజ్ఞతలు తెలియజేయడానికి తక్బీర్ చెబుతారు. “వాటి మాంసం గానీ, వాటి రక్తం గానీ అల్లాహ్ కు చేరవు! కానీ మీ భయభక్తులే ఆయనకు చేరుతాయి. మీకు సన్మార్గం చూపినందుకు, మీరు అల్లాహ్ ఘనతను కొనియాడటానికి, ఈ విధంగా ఆయన వాటిని మీకు వశపరిచాడు. సజ్జనులకు శుభవార్తను వినిపించు!” (అల్-హజ్: 37)