ప్రస్తుత విభాగం : model
పాఠం ఉమ్రా విధానం
ఉమ్రా: అంటే పవిత్ర కాబా (బైతుల్లాహ్) చుట్టూ తవాఫ్ చేయడం, సఫా మరియు మర్వా కొండల మధ్య సయీ చేయడం, ఆపై క్షౌరం చేయించుకోవడం లేదా జుట్టు కత్తిరించుకోవడం ద్వారా అల్లాహ్ ను ఆరాధించడం.
ఉమ్రాకు సంబంధించిన ఇస్లామీయ నియమం
సామర్థ్యం ఉన్నవారు జీవితంలో ఒకసారి ఉమ్రా ఆచరించడం విధి (వాజిబ్). ఆ తర్వాత వీలును బట్టి మరియు శక్తిని బట్టి దానిని మళ్ళీ మళ్ళీ ఆచరించడం అభిలషణీయం
అల్లాహ్ ఇలా సెలవిచ్చాడు: "అల్లాహ్ ప్రసన్నత కోసం హజ్ మరియు ఉమ్రాలను పూర్తి చేయండి" (బఖర: 196).
అయేషా (ర) వారి కథనం ప్రకారం: "నేను, ఓ దైవప్రవక్తా! మహిళలపై జిహాద్ ఉందా? అని అడిగాను. దానికి వారు, 'అవును, వారిపై పోరాటం లేని జిహాద్ ఉంది, అదే హజ్ మరియు ఉమ్రా' అని సెలవిచ్చారు" (అహ్మద్ 25322, ఇబ్న్ మాజా 2901).
ఉమ్రా యొక్క విశిష్ఠత
సంవత్సరంలో ఏ సమయంలోనైనా ఉమ్రా ఆచరించవచ్చు, అయితే హజ్ నెలల్లో ఆచరించడం ఉత్తమం. రమదాన్ మాసంలో ఆచరించే ఉమ్రాకు రెట్టింపు పుణ్యం లభిస్తుంది మరియు అది ఒక హజ్ ఆచరించిన పుణ్యంతో సమానం. ఇబ్న్ అబ్బాస్ (ర) వారి కథనం ప్రకారం దైవప్రవక్త ముహమ్మద్(స) వారు ఇలా సెలవిచ్చారు: "రమదాన్ మాసంలో ఒక ఉమ్రా ఆచరించడం, ఒక హజ్ చేసిన దానితో లేదా నా వెంట ఉండి హజ్ ఆచరించిన దానితో సమానం". (బుఖారీ 1863, ముస్లిము 1256).
ఉమ్రా చేసే విధానం
ఉమ్రా కోసం ఇహ్రామ్ కట్టదలచిన వారు తమ సాధారణ దుస్తులను విడిచివేసి, స్నానం (గుసుల్) చేసి, తమ తల మరియు గడ్డానికి సుగంధ ద్రవ్యాన్ని పూసుకొని, ఇహ్రామ్ వస్త్రాలను ధరించడం ధర్మసమ్మతం.
ఆ తర్వాత మీఖాత్ వద్ద ఒకవేళ అది విధిగా ఆచరించాల్సిన ఫరాద్ నమాజు సమయం అయితే ఆ నమాజును నిర్వహించాలి, ఎహ్రామ్ దుస్తులు ధరించిన తరువాత తన మనస్సులో ఉమ్రా ఆచరించాలనే సంకల్పం చేసుకొని, "లబ్బైక అల్లాహుమ్మ ఉమ్రా" అని పలకాలి.
-
పవిత్ర మస్జిద్ ఉల్ హరామ్ లో ప్రవేశించేటప్పుడు కుడి పాదం ముందుంచి, మస్జిద్ లో ప్రవేశించే దుఆను పఠించాలి. కాబా వద్దకు చేరుకున్న తర్వాత తవాఫ్ ప్రారంభించక ముందే తల్బియా పఠించడం ఆపివేయాలి. పురుషులు ఇద్తిబా (వస్త్రం యొక్క మధ్య భాగాన్ని కుడి చంక క్రింద నుండి తీసి, దాని రెండు చివరలను ఎడమ భుజంపై వేసుకోవడం) చేయడం అభిలషణీయం.
ఆ తర్వాత తవాఫ్ ప్రారంభించడానికి హజరె అస్వద్ వైపునకు వెళ్ళాలి. వీలైతే కుడి చేతితో దానిని తాకి ముద్దు పెట్టుకోవాలి. అది సాధ్యం కాకపోతే, హజరె అస్వద్ వైపు తిరిగి చేతితో సైగ చేయాలి. పవిత్ర కాబాను తన ఎడమ వైపున ఉంచుకొని ఏడు సార్లు ప్రదక్షిణలు (తవాఫ్) చేయాలి. పురుషులు మొదటి మూడు ప్రదక్షిణలలో 'రమల్' చేయాలి. రమల్ అంటే చిన్న చిన్న అడుగులు వేస్తూ వేగంగా నడవడం.
-
హజరె అస్వద్ వద్దకు వచ్చిన ప్రతిసారీ ‘అల్లాహు అక్బర్’ అని చెప్పాలి. మిగిలిన తవాఫ్ సమయంలో తనకు ఇష్టమైన రీతిలో అల్లాహ్ స్మరణ (దిక్ర్), దుఆ మరియు ఖుర్ఆన్ పఠనం చేయవచ్చు.
ఏడు ప్రదక్షిణలు (తవాఫ్) పూర్తి చేసిన తర్వాత, తన పైవస్త్రాన్ని రెండు భుజాలపై వేసుకుని, దాని రెండు చివరలను రొమ్ముపై ఉంచుకోవాలి. ఆపై మఖామె ఇబ్రాహీమ్ వద్దకు వెళ్ళి, వీలైతే దాని వెనుక లేదా మస్జిద్లో ఎక్కడైనా రెండు రకాతుల నమాజు ఆచరించాలి. మొదటి రకాతులో సూరా ఫాతిహా తర్వాత "ఖుల్ యా అయ్యుహల్ కాఫిరూన్" మరియు రెండూ రకాతులో సూరా ఫాతిహా తర్వాత "ఖుల్ హువల్లాహు అహద్" పఠించాలి.
ఆపై సయీ చేసే స్థలానికి (మస్ఆ) వెళ్ళాలి. సఫా కొండకు చేరువైనప్పుడు అల్లాహ్ యొక్క ఈ వాక్యాన్ని పఠించాలి: "నిశ్చయంగా సఫా మరియు మర్వా కొండలు అల్లాహ్ ఆరాధనలకు చిహ్నాలు" (ఇన్నస్సఫా వల్ మర్వత మిన్ షఆఇరిల్లాహ్). ఇంకా ఇలా అనాలి: "అల్లాహ్ దేనితోనైతే ప్రారంభించాడో, నేను కూడా దానితోనే ప్రారంభిస్తున్నాను."
ఆ తర్వాత సఫా కొండపైకి వెళ్లి కాబా వైపు తిరిగి, చేతులు ఎత్తి అల్లాహ్ ను స్తుతిస్తూ దుఆ చేయాలి. దైవప్రవక్త ముహమ్మద్(స) వారు చేసే దుఆలలో ఇది ఒకటి: "అల్లాహ్ తప్ప మరే ఆరాధ్యుడు లేడు, ఆయన ఒక్కడే, ఆయనకు ఎవరూ భాగస్వాములు లేరు. రాజ్యమంతా ఆయనదే, స్తోత్రాలన్నీ ఆయనకే దక్కుతాయి మరియు ఆయన ప్రతి వస్తువుపై సర్వశక్తుడు. అల్లాహ్ తప్ప మరే ఆరాధ్యుడు లేడు, ఆయన ఒక్కడే. ఆయన తన వాగ్దానాన్ని నెరవేర్చాడు, తన దాసుడికి సహాయం చేశాడు మరియు శత్రువుల సైన్యాన్ని ఒక్కడే ఓడించాడు". ఆపై తనకు ఇష్టమైన రీతిలో దుఆ చేయాలి. ఈ విధంగా మూడు సార్లు చేయాలి.
-
ఆ తర్వాత సఫా కొండ నుండి దిగి మర్వా వైపు సాగాలి. సయీ చేసే స్థలంలో పచ్చని దీపాలు ఉన్న రెండు గుర్తుల మధ్యకు చేరుకున్నప్పుడు, పురుషులు తమ శక్తి మేరకు వేగంగా పరుగెత్తడం అభిలషణీయం. అయితే మహిళలు ఆ రెండు గుర్తుల మధ్య వేగంగా పరుగెత్తవలసిన అవసరం లేదు, వారు సయీ అంతటా సాధారణంగానే నడవాలి.
-
ఆపై మర్వా కొండను చేరుకునే వరకు నడకను కొనసాగించాలి. దానిపైకి వెళ్లి ఖిబ్లా వైపు తిరిగి, చేతులు ఎత్తి సఫా కొండపై పలికినట్లే పలకాలి. అయితే అక్కడ పఠించిన ఖుర్ఆన్ వాక్యాన్ని మరియు "అల్లాహ్ దేనితోనైతే ప్రారంభించాడో, నేను కూడా దానితోనే ప్రారంభిస్తున్నాను" అనే మాటలను ఇక్కడ పలకకూడదు.
-
ఆపై మర్వా నుండి దిగి సఫా వైపునకు సాగాలి. రెండు పచ్చని గుర్తుల మధ్యకు చేరుకున్నప్పుడు వేగంగా పరుగెత్తాలి. సఫా వద్దకు చేరుకున్నాక మర్వా వద్ద చేసినట్లే చేయాలి. ఈ విధంగా ఏడు సార్లు పూర్తి చేయాలి. వెళ్ళడం ఒక చుట్టుగాను, తిరిగి రావడం మరొక చుట్టుగాను పరిగణించబడుతుంది. సయీ చేస్తున్న సమయంలో వీలైనంత ఎక్కువగా అల్లాహ్ స్మరణ (దిక్ర్) మరియు దుఆలు చేయడం అభిలషణీయం. అలాగే పెద్ద అశుద్ధత (జనాబత్) మరియు చిన్న అశుద్ధత నుండి విముక్తులై శుద్ధతతో ఉండటం ఉత్తమం.
-
సయీ పూర్తి చేసిన తర్వాత సయీ స్థలం (మస్ఆ) నుండి బయటకు వచ్చి, తల వెంట్రుకలను పూర్తిగా తొలగించుకోవాలి (క్షౌరం చేయించుకోవాలి) లేదా కత్తిరించుకోవాలి. అయితే పూర్తిగా క్షౌరం చేయించుకోవడం ఉత్తమం.
అబ్దుల్లా బిన్ ఉమర్ (ర) వారి కథనం ప్రకారం దైవప్రవక్త ముహమ్మద్(స) వారు ఇలా దుఆ చేశారు: "ఓ అల్లాహ్! క్షౌరం చేయించుకున్న వారిని కరుణించు". అప్పుడు ప్రజలు "ఓ దైవప్రవక్త! వెంట్రుకలు కత్తిరించుకున్న వారిని కూడా (కరుణించమని వేడుకోండి)" అని కోరారు. దానికి వారు(స) మళ్ళీ "ఓ అల్లాహ్! క్షౌరం చేయించుకున్న వారిని కరుణించు" అని పలికారు. వారు మరొకసారి "ఓ దైవప్రవక్త! వెంట్రుకలు కత్తిరించుకున్న వారిని కూడా" అని కోరగా, అప్పుడు వారు (స) "మరియు వెంట్రుకలు కత్తిరించుకున్న వారిని కూడా (కరుణించు)" అని అనారు. (బుఖారీ 1727, ముస్లిము 1301).
మహిళలు తమ వెంట్రుకలన్నింటినీ కలిపి పట్టుకుని, వాటి చివర నుండి ఒక అంగుళం పరిమాణం వరకు కత్తిరించుకోవాలి. ఇహ్రామ్ స్థితిలో ఉన్నవారు పైన పేర్కొన్న విధంగా చేసినట్లయితే, వారి ఉమ్రా పూర్తవుతుంది మరియు ఇహ్రామ్ కారణంగా వారిపై నిషేధించబడినవన్నీ ధర్మసమ్మతం అవుతాయి.
اختر مستوى الشرح المناسب لك
يحتوي الدرس الآن على طبقات اختيارية تساعدك على المراجعة السريعة أو التعمق دون مغادرة الدرس.
- الملخص: نظرة سريعة في نحو دقيقة.
- الأساسي: محتوى الدرس الأصلي وهو المسار المعتمد للتقدم.
- المتعمق: تفاصيل إضافية اختيارية عند توفرها.
تقدمك وإكمال الدرس يعتمدان دائما على صفحات المستوى الأساسي.
