குளிர்கால பயணங்களில்-குறிப்பாக கூடாரம் போன்றவற்றில்- பெரும்பாலும் மூட்டப்படும் நெருப்பை உறங்குவதற்கு முன் அணைத்து விட வேண்டும்.

அடிப்படையில் வேட்டையாடுதல் அனுமதிக்கப்பட்டதாகும், எனினும் உள்ளம் அதனுடனேயே தொடர்பு பட்டிருப்பதற்கும் மதம் மற்றும் குடும்ப நலன்களிலிருந்து திசைதிருப்பப்படுவதற்கும் வேட்டை ஒரு காரணமாக இருக்கக் கூடாது. அல்லது வீண்விரயம், வீண் விளையாட்டு, பெருமையடித்தல் போன்றவற்றுக்குக் காரணமாகவும் இருக்கக் கூடாது. "கிராமப் புறத்தில் வசிப்பவர் கடுமையாக நடந்து கொள்வார், வேட்டையில் தொடர்ந்திருப்பவர் (ஏனையவற்றில்) அலட்சியமாக இருப்பார்" என நபிமொழியொன்றில் இடம்பெற்றுள்ளது. (அபூதாவூத் 2859).

மார்க்கம் தடுத்ததைத் தவிர ஏனைய அனைத்துப் பிராணிகளையும் வேட்டையாடலாம் என்பதே அடிப்படையாகும். உதாரணமாக : ஓநாய், நரிகள் போன்ற கோரைப் பற்களுடைய பிராணிகள், கழுகுகள் கோரை நகங்களைக் கொண்ட பறவைகள், பாம்புகள் போன்ற விஷ ஜன்துக்கள் போன்றன தடை செய்யப்பட்டவையாகும்.

(மக்கா, மதீனா போன்ற) புனித பூமியிலோ, (ஹஜ், உம்ரா போன்ற வணக்கத்திற்காக) இஹ்ராம் நிய்யத் வைத்தவரோ வேட்டையாடுதல் ஹராமாகும். புனித மாதங்கள், ரமழான், வெள்ளிக்கிழமை என்ற வேறுபாடின்றி வருடத்தின் எக்காலத்திலும் வேட்டையாடலாம், பிறருக்கு சொந்தமான பிராணிகளை வேட்டையாடுவதும் ஹராமாகும்.

வேட்டையாடுபவர் முஸ்லிமாக இருப்பதுடன், அல்லாஹ்வின் பெயரையும் கூறியே வேட்டையாட வேண்டும். பறவை தன்னை மீறிப் பறந்தாலோ, தான் அறியாமலே துப்பாக்கி ரவை பாய்ந்து சென்றால் அப்பிராணியை மரணிக்க முன் பிடித்து, அல்லாஹ்வின் பெயர் கூறி அறுக்காமல் அதனை உண்ண முடியாது.

அத்துடன் கழுத்தை நெறித்தோ, நீரில் மூழ்கடித்தோ, கனமான பொருளால் அடித்தோ, உயரமான இடத்திலிருந்து வீழ்த்தியோ கொன்றதல்லாமல் வேட்டைப் பிராணியின் உயிரிழப்பிற்கான காரணம் இவர் ஏற்படுத்திய காரணமாகவே இருத்தல் வேண்டும், உயிருடனிருக்கும் போதே வேட்டைப் பிராணி கிடைத்தால் சட்டபூர்வமாக அதனை அறுக்க வேண்டும்.

உண்ணும் நோக்கமின்றி வீண் கேளிக்கைக்காக வேட்டையாடுவது முற்றிலும் தடுக்கப்பட்டதாகும். அதே போன்றுதான் வேட்டைக் கருவிகளால் மக்களை அச்சுறுத்துவதும் கூடாத செயலாகும். மேலும் வேட்டைப் பயிற்சிக்கான இலக்காக பறவைகளைக் கட்டிவைப்பதும் பாவமாகும்.

விளையாட்டிற்குக் கூட பிறர் மீது ஆயுதங்களால் சுட்டிக்காட்டுவது ஹராமாகும். நபி (ஸல்) அவர்கள் கூறினார்கள் : "நீங்கள் உங்கள் சகோதரரை நோக்கி ஆயுதத்தைக் காட்டி சைகை செய்யவேண்டாம். ஏனெனில், உங்களுக்குத் தெரியாமலேயே ஷைத்தான் உங்கள் கையிலிருந்து அதைப் பிடுங்கி (சகோதரர் மீது தாக்குதல் நடத்தி) விடக்கூடும். அதனால் நீங்கள் நரகத்தில் வீழ்ந்துவிடக் கூடும்". (புஹாரி 7072, முஸ்லிம் 2617). மேலும் கூறினார்கள் : "ஒருவர் தம் சகோதரரை நோக்கி ஆயுதத்தைக் காட்டி சைகை செய்தால்,அவர் அதைக் கைவிடும்வரை அவரை வானவர்கள் சபிக்கின்றனர். அவர் உடன்பிறந்த சகோதரராய் இருந்தாலும் சரியே". (முஸ்லிம் 2616).

தன்னையும் பிறரையும் பாதுகாப்பதற்காக வேட்டையின் ஒழுங்கு விதிகள், பாதுகாப்பு முன்னெச்சரிக்கைகளை அறிந்து வைத்தல் அவசியமாகும். பிராணிகளை அறுக்கும் முறை, வேட்டை நாய்களைக் கையாளும் முறை, வேட்டைப் பிராணிகளின் மரண நிலைகள் போன்றன பற்றி குறிப்பான சட்டதிட்டங்கள் உள்ளன. துறைசார்ந்தவர்களிடம் சென்று அதனைக் கற்றுக் கொள்ள வேண்டும்.

மார்க்கம் தடுத்தவற்றைத் தவிர அனைத்து உணவு வகைகளும் ஆகுமானதாகும்.

வனாந்தரம் மற்றும் சந்தைகளில் கிடைக்கும் அனைத்து வித தானியங்கள், பழ வகைகளும் அனுமதிக்கப்பட்டவையாகும். இருப்பினும் தனக்குத் தீங்கிழைப்பவை, அல்லது ஆரோக்கியம் உறுதிப்படுத்தப்படாதவற்றை உட்கொள்ளக் கூடாது.