పవిత్ర ఖుర్ఆన్ వ్యాఖ్యానం (తఫ్సీర్) మరియు దానిపై లోతుగా ఆలోచించడం (తదబ్బుర్).

ప్రతి ముస్లిము పవిత్ర ఖుర్ఆన్‌ను సరైన రీతిలో పఠించడానికి ప్రాధాన్యత ఇవ్వాలి. దానిలోని అర్థాలు, ఆజ్ఞలు మరియు నిషేధాల గురించి లోతుగా ఆలోచించి, పరిశీలన చేయాలి. అలాగే దాని వ్యాఖ్యానాన్ని (తఫ్సీర్), ధర్మశాస్త్ర నియమాలను నేర్చుకుని, తదనుగుణంగా ఆచరించాలి. అప్పుడే ఇహలోకంలోనూ మరియు పరలోకంలోనూ సాఫల్యాన్ని పొందడం సాధ్యమవుతుంది.

తదబ్బుర్ అనగా

తదబ్బుర్ (లోతుగా ఆలోచించడం): అంటే ఆయతుల దగ్గర ఆగి, వాటిని నిశితంగా పరిశీలిస్తూ, వాటితో మమేకం కావడం; తద్వారా ప్రయోజనం పొందడం మరియు ఆజ్ఞలను పాటించడం.

పవిత్ర ఖుర్ఆన్ ఆయతులపై లోతుగా ఆలోచించే (తదబ్బుర్ చేసే) వారు ఆ ఆయతుల యొక్క సమగ్ర భావాన్ని తప్పక తెలుసుకోవాలి. తద్వారా వారి ఆలోచనా విధానం మరియు అవగాహన సరైన రీతిలో ఉంటాయి.

పవిత్ర ఖుర్ఆన్‌పై లోతుగా ఆలోచించడం (తదబ్బుర్) యొక్క ప్రాముఖ్యత.

ప్రతి ముస్లిము ఈ మహత్తరమైన ఖుర్ఆన్‌పై లోతుగా ఆలోచించాలి, దాని ఆయతులను మరియు అర్థాలను అవగాహన చేసుకోవాలి, ఇంకా దానితో మమేకమై జీవించాలి. అల్లాహ్ ఇట్లు సెలవిచ్చాడు: "మేము నీపై అవతరింపజేసిన ఈ గ్రంథం ఎంతో శుభప్రదమైనది. ప్రజలు దీని ఆయతులపై లోతుగా ఆలోచించాలని మరియు విజ్ఞులు దీని ద్వారా హితబోధ పొందాలని దీనిని పంపాము" (సాద్: 29). మరియు అల్లాహ్ ఇట్లు సెలవిచ్చాడు: "ఏమిటి, వారు ఖుర్ఆన్ గురించి లోతుగా ఆలోచించరా? లేక వారి హృదయాలకు తాళాలు వేయబడి ఉన్నాయా?" (ముహమ్మద్: 24).

తవ్యాఖ్యానం (తఫ్సీర్) యొక్క ప్రాముఖ్యత మరియు దాని ఆవశ్యకత.

తఫ్సీర్ శాస్త్రం అత్యంత ప్రయోజనకరమైన మరియు మహత్తరమైన శాస్త్రాలలో ఒకటి; ఎందుకంటే ఇది అల్లాహ్ గ్రంథానికి సంబంధించినది. ఇది అల్లాహ్ యొక్క వాణిని అర్థం చేసుకోవడానికి మరియు ఆయన ఉద్దేశాన్ని గ్రహించడానికి తోడ్పడుతుంది. తఫ్సీర్ శాస్త్రం ద్వారానే పవిత్ర ఖుర్ఆన్ యొక్క అర్థాలు తెలుస్తాయి. ఇవి ముస్లిము సన్మార్గంలో నడుస్తూ సత్కార్యాలు చేయడానికి, అల్లాహ్ ప్రసన్నతను పొందడానికి మరియు ఆయన స్వర్గవనాలకు అర్హులు కావడానికి సహాయపడతాయి. పవిత్ర గ్రంథంలో పేర్కొన్న ఆదేశాలను పాటించడం, నిషేధించిన వాటికి దూరంగా ఉండటం, అందులోని గాథల నుండి గుణపాఠం నేర్చుకోవడం మరియు అందులోని విషయాలను విశ్వసించడం ద్వారా ఇది సాధ్యమవుతుంది. తఫ్సీర్ శాస్త్రం ద్వారానే మనిషికి సత్యం ఏదో, అసత్యం ఏదో స్పష్టంగా తెలుస్తుంది మరియు ఆయతుల అర్థాలను, వాటి యదార్థ ఉద్దేశాలను గ్రహించేటప్పుడు కలిగే ఎటువంటి సందేహాలైనా తొలగిపోతాయి.

సహాబాలు(ర) ఖుర్ఆన్ యొక్క అర్థాలను మరియు దాని వ్యాఖ్యానాన్ని దైవప్రవక్త ముహమ్మద్(స) వారి నుండి తెలుసుకోవడంపై ఎంతో ఆసక్తి కనబరిచేవారు.

గౌరవనీయులైన సహాబాలు(ర) ఖుర్ఆన్‌లోని తమకు అర్థం కాని విషయాల గురించి దైవప్రవక్త ముహమ్మద్(స) వారిని అడిగి తెలుసుకునేవారు. అబ్దుల్లా బిన్ మసూద్ (ర) వారు ఇలా సెలవిచ్చారు: "ఎవరైతే విశ్వసించారో మరియు తమ విశ్వాసంలో అన్యాయాన్ని(జుల్మ్) కలపలేదో.." (అన్-ఆమ్: 82) అనే ఆయత్ అవతరించినప్పుడు, అది దైవప్రవక్త ముహమ్మద్(స) వారి అనుచరులకు ఎంతో భారంగా అనిపించింది. వారు, "మాలో తమకు తాము అన్యాయం చేసుకోని వారు ఎవరున్నారు?" అని అడిగారు. అప్పుడు దైవప్రవక్త ముహమ్మద్(స) వారు ఇలా సెలవిచ్చారు: "మీరు అనుకుంటున్నట్లుగా అది కాదు, అది లుక్మాన్ తన కుమారుడికి చెప్పినట్లుగా: 'ఓ నా కుమారా! అల్లాహ్‌కు భాగస్వాములను కల్పించకు, నిశ్చయంగా షిర్క్ (బహుదైవారాధన) ఘోరమైన అన్యాయం(లుక్మాన్: 13). బుఖారీ (6937), ముస్లిం (124).

పవిత్ర ఖుర్ఆన్ యొక్క వ్యాఖ్యానాన్ని మరియు దాని అర్థాలను తెలుసుకోవడానికి ఈ క్రింది మార్గాలను అనుసరించాలి:

మొదటిది : ఖురానును ఖురానుతో వివరించడం

ఎందుకంటే అల్లాహ్ దానిని అవతరింపజేశాడు మరియు తన ఉద్దేశ్యం ఏమిటో ఆయనకు బాగా తెలుసు.

ఉదాహరణకు: అల్లాహ్ ఈ విధంగా సెలవిచ్చాడు: "తెలుసుకోండి! నిశ్చయంగా అల్లాహ్ యొక్క మిత్రులకు (అవ్'లియా అల్లాహ్) ఎటువంటి భయం ఉండదు, వారు దుఃఖించరు. వారు ఎవరంటే, విశ్వసించి దైవభీతి కలిగి ఉండేవారు" (యూనుస్: 62-63). ఇక్కడ అల్లాహ్ యొక్క మిత్రులు అంటే ఎవరో "విశ్వసించి దైవభీతి కలిగి ఉండేవారు" అని అదే ఆయత్ ద్వారా స్పష్టమైంది.

రెండవది: సున్నత్ (ప్రవక్త ప్రవచనాలు/హదీసులు) ద్వారా ఖుర్ఆన్ వ్యాఖ్యానం.

ఎందుకంటే దైవప్రవక్త ముహమ్మద్(స) వారు అల్లాహ్ సందేశాన్ని చేరవేసేవారు, కనుక అల్లాహ్ తన వాక్కు ద్వారా ఏమి ఉద్దేశించాడో ప్రజలందరికంటే వారికే అత్యంత బాగా తెలుసు.

దీనికి ఉదాహరణ: దైవప్రవక్త ముహమ్మద్(స) వారు 'శక్తి' (ఖువ్వత్) అంటే లక్ష్యాన్ని ఛేదించడం (అస్త్రాలను ప్రయోగించడం) అని వివరించారు. ఉక్బా బిన్ ఆమిర్ (ర) వారు ఇలా ఉల్లేఖించారు: "దైవప్రవక్త ముహమ్మద్(స) వారు ప్రసంగ వేదిక (మింబర్) పై ఉండి ఇలా సెలవిస్తుండగా నేను విన్నాను: 'వారికోసం మీ శక్తి మేరకు (యుద్ధ సామాగ్రిని) సిద్ధం చేసుకోండి' (అన్ఫాల్: 60). వినండి! నిశ్చయంగా శక్తి అంటే అస్త్రాలను ప్రయోగించడమే, వినండి! నిశ్చయంగా శక్తి అంటే అస్త్రాలను ప్రయోగించడమే, వినండి! నిశ్చయంగా శక్తి అంటే అస్త్రాలను ప్రయోగించడమే" ముస్లిం (1917).

మూడవది: సహాబీల (ర) వారి ద్వారా ఖుర్ఆన్ వ్యాఖ్యానం.

ఎందుకంటే వారు ఖుర్ఆన్ అవతరణ సమయంలో జరిగిన సంఘటనలు మరియు పరిస్థితులకు ప్రత్యక్ష సాక్షులు. అంతేకాకుండా, వారు పరిపూర్ణమైన అవగాహన, సరైన జ్ఞానం మరియు సత్కర్మలు కలిగి ఉన్నవారు.

దీనికి ఉదాహరణ: అల్లాహ్ ఈ విధంగా సెలవిచ్చారు: "ఒకవేళ మీరు అనారోగ్యగ్రస్తులైతే లేదా ప్రయాణంలో ఉన్నా లేదా మీలో ఎవరైనా మలవిసర్జన చేసి వచ్చినా లేదా మీరు స్త్రీలను తాకినా..." (నిసా: 43). ఇక్కడ 'తాకడం' (ములామస) అంటే లైంగిక కలయిక (జిమా) అని ఇబ్న్ అబ్బాస్ (ర) వారు వ్యాఖ్యానించారు. తఫ్సీర్ అల్-తబరీ (8/389).

నాలుగు : తాబాయీన్ల ద్వారా చేయబడిన వివరణ

వీరు సహాబీలు (ర) వారి నుండి ఖుర్ఆన్ వ్యాఖ్యానాన్ని స్వీకరించడంలో ఎంతో శ్రద్ధ వహించారు. ఎందుకంటే సహాబీల (ర) వారి తర్వాత ఈ తాబియీలే అత్యుత్తమమైన వారు మరియు వారి తర్వాత వచ్చిన వారితో పోలిస్తే వీరు మనోవాంఛలకు లోనుకాకుండా అత్యంత సురక్షితంగా ఉండేవారు. వీరి కాలంలో అరబీ భాష కూడా పెద్దగా మార్పులకు గురికాకపోవడం వల్ల, వీరి తర్వాత వచ్చిన వారికంటే వీరే ఖుర్ఆన్ అవగాహనలో సత్యానికి అత్యంత సమీపంలో ఉండేవారు.

పవిత్ర ఖుర్ఆన్ వ్యాఖ్యానం (తఫ్సీర్) విషయంలో ఒక ముస్లిముకు ఉండవలసిన బాధ్యత.

ఒక ముస్లిముకు పవిత్ర ఖుర్ఆన్‌ను అర్థం చేసుకోవడంలో లేదా దాని అర్థాలను తెలుసుకోవడంలో ఏదైనా సందేహం కలిగితే, ఆయా ఆయతుల వివరణ మరియు వ్యాఖ్యానం కోసం ప్రామాణికమైన తఫ్సీర్ గ్రంథాలను మరియు గుర్తింపు పొందిన వ్యాఖ్యాతలైన విద్వాంసుల వివరణలను ఆశ్రయించాలి.

పవిత్ర ఖుర్ఆన్ వ్యాఖ్యానం (తఫ్సీర్) చేయడం అనేది ప్రతి ముస్లిముకు సాధ్యపడే పని కాదు; అది కేవలం వ్యాఖ్యాన శాస్త్రంలో ప్రావీణ్యం ఉన్న పండితులకు మాత్రమే పరిమితం. కావున సామాన్య ముస్లిములు తగిన జ్ఞానం లేకుండా ఆ పనికి పూనుకోకూడదు. ఎందుకంటే, వ్యాఖ్యాత అల్లాహ్ తరపున ఆయన సందేశాన్ని వివరించేవాడు మరియు ఆయన వాక్యం ద్వారా ఆయన ఉద్దేశ్యాన్ని ధృవీకరించే సాక్షి వంటివాడు. అటువంటి సాక్ష్యం ఇచ్చేటప్పుడు అత్యంత గౌరవభావంతో ఉండాలి మరియు జ్ఞానం లేకుండా అల్లాహ్ గురించి మాట్లాడితే, అల్లాహ్ నిషేధించిన దానిని చేసినట్లవుతుందని భయపడాలి. లేనిచో పునరుత్థాన దినమున అవమానానికి గురికావలసి వస్తుంది. అల్లాహ్ ఇలా సెలవిచ్చాడు: "ప్రకటించు: 'నా ప్రభువు నిషేధించినవి ఇవే: బహిరంగంగా లేదా రహస్యంగా చేసే అశ్లీల పనులు, పాపకార్యాలు, అన్యాయంగా హద్దులు మీరుట, అల్లాహ్ ఎటువంటి ఆధారాన్ని ఇవ్వని వాటిని ఆయనకు భాగస్వాములుగా కల్పించుట మరియు మీకు తెలియని విషయాలను అల్లాహ్ కు ఆపాదిస్తూ మాట్లాడుట'." (అల్ ఆరాఫ్: 33).

ముఖ్యమైన ఖుర్ఆన్ వ్యాఖ్యాన గ్రంథాలు (తఫ్సీర్లు)