ప్రస్తుత విభాగం : model
పాఠం తల్లిదండ్రుల హక్కులు
ఇస్లాం ధర్మం తల్లిదండ్రులను అత్యున్నతంగా గౌరవించింది. అల్లాహ్ తన ఏకత్వాన్ని (తౌహీద్ను) చాటిచెప్పే అత్యంత గొప్ప విషయంతో పాటు తల్లిదండ్రుల పట్ల ఉపకారం చేయడాన్ని కూడా కలిపి పేర్కొన్నాడు. అల్లాహ్ ఇలా సెలవిచ్చాడు: “మరియు నీ ప్రభువు: తనను తప్ప ఇతరులను ఆరాధించకూడదనీ మరియు తల్లిదండ్రుల పట్ల ఉత్తమంగా వ్యవహరించాలనీ, ఆజ్ఞాపించి ఉన్నాడు. (అల్-ఇస్రా: 23) అల్లాహ్ తల్లిదండ్రులను కుమారులు మరియు కుమార్తెల పుట్టుకకు మూలకారకులుగా చేశాడు. సంతానం ఎంత చేసినా, తమ సౌఖ్యం కోసం మరియు తమ సంరక్షణ, సంపాదన కోసం తల్లిదండ్రులు పడిన కష్టానికి, శ్రమకు, ఇబ్బందులకు, నిద్రలేని రాత్రులకు, త్యాగం చేసిన విశ్రాంతికి వారు చేసిన మేలులో ఏ కొంచెం కూడా తిరిగి తీర్చుకోలేరు.
అల్లాహ్ తన న్యాయశీలతతో, తల్లిదండ్రులు తమ సంతానం పట్ల చూపిన మరియు చూపుతున్న ఆ అద్భుతమైన సంరక్షణకు, వారు చేసిన సత్కార్యాలకు ప్రతిఫలంగా వారిపై సంతానానికి కొన్ని హక్కులను నిర్ణయించాడు. అల్లాహ్ ఇలా సెలవిచ్చాడు: "మేము మనిషికి తన తల్లిదండ్రులతో మంచిగా ప్రవర్తించాలని హితవు పలికాము" (అల్ అన్కబూత్: 8). మరియు ఇలా సెలవిచ్చాడు: "ఈ ప్రపంచంలో వారితో (తల్లిదండ్రులతో) సద్భావంతో మెలగండి" (లుఖ్మాన్: 15). ఒక సహాబీ (ర) వారు దైవప్రవక్త ముహమ్మద్(స) వారిని ఇలా అడిగారు: "ఓ అల్లాహ్ ప్రవక్తా! నా నుండి అత్యుత్తమ సేవలందుకోవడానికి ప్రజలందరిలో ఎవరు ఎక్కువ అర్హులు?". దానికి వారు, "నీ తల్లి" అని సెలవిచ్చారు. ఆయన, "తర్వాత ఎవరు?" అని అడగగా, వారు, "నీ తల్లి" అని సెలవిచ్చారు. ఆయన మళ్ళీ, "తర్వాత ఎవరు?" అని అడగగా, వారు, "నీ తల్లి" అని సెలవిచ్చారు. ఆయన, "తర్వాత ఎవరు?" అని అడగగా, వారు, "నీ తండ్రి" అని సెలవిచ్చారు. (బుఖారీ: 5971, ముస్లిం: 2548).
తల్లిదండ్రుల పట్ల సద్ప్రవర్తన కలిగి ఉండటంలోని విశిష్టత
తల్లిదండ్రుల పట్ల విధేయత చూపడం సంతానంపై ఉన్న విధి మరియు బాధ్యత. వారి పట్ల విధేయత చూపడంలో గొప్ప పుణ్యం మరియు అత్యున్నతమైన ప్రతిఫలం ఉంది. ఇది ఇహలోకంలో శుభాలకు (బరకత్), జీవనోపాధికి (రిజ్క్) మరియు అపారమైన మేలుకు కారణం కాగా, పరలోకంలో స్వర్గ ప్రవేశానికి మార్గమవుతుంది. దైవప్రవక్త ముహమ్మద్(స) వారు ఇలా సెలవిచ్చారు: "అతడు మట్టిలో కలిసిపోగాక! (అవమానానికి గురికాగాక), తర్వాత అతడు మట్టిలో కలిసిపోగాక!, తర్వాత అతడు మట్టిలో కలిసిపోగాక!". అప్పుడు "ఓ అల్లాహ్ ప్రవక్తా! ఎవరు వారు?" అని అడగగా, దైవప్రవక్త ముహమ్మద్(స) వారు ఇలా సెలవిచ్చారు: "ఎవరైతే తమ తల్లిదండ్రులు వృద్ధాప్యంలో ఉన్నప్పుడు వారిద్దరిని లేదా వారిలో ఒకరిని పొంది కూడా (వారికి సేవ చేసి) స్వర్గంలో ప్రవేశించలేకపోయారో వారు". (ముస్లిం: 2551).
తల్లిదండ్రుల పట్ల విధేయత చూపడం అనేది అత్యుత్తమమైన కార్యాలలో ఒకటి మరియు అల్లాహ్కు అత్యంత ఇష్టమైనది. అబ్దుల్లా బిన్ మసూద్ (ర) వారు దైవప్రవక్త ముహమ్మద్(స) వారిని ఇలా అడిగారు: "అల్లాహ్కు అత్యంత ఇష్టమైన కార్యం ఏది?". దానికి వారు, "నమాజును దాని నిర్ణీత సమయంలో నిర్వర్తించడం" అని సెలవిచ్చారు. ఆయన, "తర్వాత ఏది?" అని అడగగా, వారు, "తర్వాత తల్లిదండ్రుల పట్ల విధేయత చూపడం" అని సెలవిచ్చారు. ఆయన మళ్ళీ, "తర్వాత ఏది?" అని అడగగా, వారు, "అల్లాహ్ మార్గంలో పోరాడడం" అని సెలవిచ్చారు. (బుఖారీ: 527, ముస్లిం: 85).
తల్లిదండ్రుల పట్ల విధేయత చూపడం అనేది నఫిల్ (ఐచ్ఛిక) జిహాద్ కంటే ఉత్తమమైనది. ఒక వ్యక్తి దైవప్రవక్త ముహమ్మద్(స) వారి వద్దకు వచ్చి: "నేను జిహాద్లో పాల్గొనవచ్చా?" అని అడిగారు. దానికి వారు: "నీకు తల్లిదండ్రులు ఉన్నారా?" అని అడిగారు. ఆయన: "అవును, ఉన్నారు" అని సమాధానమిచ్చారు. అప్పుడు వారు: "అయితే వారి సేవలోనే నీ జిహాద్ ఉంది (వారికి సేవ చేసి పుణ్యం సంపాదించుకో)" అని సెలవిచ్చారు. (బుఖారీ: 5972, ముస్లిం: 2549).
తల్లిదండ్రుల పట్ల అవిధేయత
తల్లిదండ్రుల పట్ల అవిధేయత చూపడం అనేది మహా పాపాలలో (కబాయిర్) ఒకటి మరియు అత్యంత ఘోరమైన నేరం. హదీసులో ఉన్నదాని ప్రకారం, దైవప్రవక్త ముహమ్మద్(స) వారు ఇలా సెలవిచ్చారు: "మహా పాపాలలోకెల్లా అతి పెద్దవి: అల్లాహ్కు భాగస్వాములను కల్పించడం (షిర్క్), తల్లిదండ్రుల పట్ల అవిధేయత చూపడం... (హదీసు చివరి వరకు)". (బుఖారీ: 6919, ముస్లిం: 87).
